SHILLONG:
U MLA barim ka Mawsynram konstitwensi u Bah H.M Shangpliang u la ong ba ka rai jong u ban ieh noh ïa ka All India Trinamool Congress (AITC) ka long namar ba ki nongshong shnong ka Mawsynram konstitwensi kim mon ïa ka AITC.
Haba kren ha ki lad pathai khubor ha ka 15 tarik Nohprah, u Bah HM Shangpliang u ba la dep ban pynïasoh pura ïalade sha ka BJP ha ka 14 tarik Nohprah, u la ong ba ka rai ban jied ïa ka BJP ka long ban wanrah ïa ki kam pynroi ha ka jylla.
U la ong, “Dei tang lyngba ka jingïarap u myntri rangbahduh ka Ri u Narendra Modi ba ka jylla Meghalaya kan ïoh ïa ka jingkylla ha ka roi ka par ha ka jylla”.
U la ong ba ka Congress ka la don ka jingtlot ha baroh ki liang, ka don ka jingbym sngewthuh jingmut hapdeng ki nongïalam ha seng kmie bad ha ka jylla bad u la rai ban mih noh na ka Congress bad pynïasoh sha ka AITC hynrei ïa ka TMC ki paidbah ha konstitwensi jong u kim kwah ban pdiang.
“Nga la pyrshang ban pynsngewthuh ïa ki, ba kin pdiang ïa ka TMC hynrei kim kwah bad ki la ai jingmut ban leit sha ka BJP namar ki nongshong shnong ha ki thaiñ nongkyndong ki la sngewthuh kumno u Myntri rangbahduh ka Ri u Narendra Modi u la ïarap ïa ki ha ka por ba wan ka khlam Covid haduh mynta ruh ïa u khaw Modi baroh ki tip bad ki la ai jingmut hi ba ngan leit sha ka BJP”, u la bynrap.
U Samuel M Sangma u MLA ka Baghmara konstitwensi u la ong ba ka rai ban pynïasoh sha ka BJP ka long ban ïoh ïa ka roi ka par ïa ka jylla bad ka rai ban iehnoh ïa ka jingkyrshan sha ka UDP ka dei ka rai shimet jong u.
Haba kylli halor ka jingiehnoh jong u ïa ka shuki MLA u la ong, “Ngam don kam ban hiar shuki namar nga dei u MLA shimet , bad nga la pynïasoh sha ka BJP bad ngan sa ïakhun na ka BJP ha u snem 2023”.
