SHILLONG:
U kyrtong ka National People’s Party (NPP) u Bah Hamletson Dohling na ka Mylliem konstitwensi ha ka 6 tarik Rymphang u la ong, ba ki paidbah ka Mylliem ki dang shaniah ïa u bad um artatien ban jop biang ha kane ka kynti.
Haba kren sha ki lad pathai khubor hadien ba u la dep thep kyrteng na ka bynta kane ka jingjied nongmihkhmat kaban long ha ka 27 tarik Rymphang, u Bah Hamlet u la ong ba ki paidbah ka Mylliem konstitwensi ki la pynjop ïa u, ha u 2018 hynrei kam long kaba suk namar 2 snem ka jylla ka la duh ka por ban pyntrei ki kam pynroi na kadaw ka jingwan lyngshop ka khlam Covid-19 ym hynrei ïa ka Ri India bad ka pyrthei hi baroh kawei. U la ong ba ki tip ïa kata baroh ki kam ki la sahkut lut na kadaw jong ka jingkhang dam jong ka trei ka ktah, ka khaii ka pateng ryngkat bad ka leit ka wan na kadaw jong ka jingpyntreikam ïa ki kyndon ka koit ka khiah ban the lakam ïa ka jingsaphriang jong kane ka jingpang.
U Bah Hamlet u la ong ba ha kine ki lai snem u la trei shitom katba lah ban wanrah ka roi ka par bad ruh ban pynbiang ki jingdonkam ki shnong ki thaw hapoh kane ka konstitwensi.
“Ar snem ngi la duh ka por ban pyntrei ïa ki kam pynroi na ka daw ka jingwan lyngshop ka khlam Covid-19 hapoh ka jylla hynrei ha kine ki 3 snem nga la trei shitom katba lah ban wanrah ka roi ka par bad ruh ban pynbiang ki jingdonkam ki shnong ki thaw hapoh kane ka konstitwensi”, la ong u Bah Hamlet.
Haba kylli kumno u sngew shaphang kane ka jingïakhun ïa kane ka jingjied nongmihkhmat, u Bah Hamlet uba la leit ban pynïasnoh ïalade bad ka NPP na ka seng People’s Democratic Front (PDF) u la ong ba ki paidbah ka Mylliem ki dang shaniah ïa u bad um artatien ban jop biang ha kane ka kynti.
Shuh shuh u la bynrap ruh da kaba ong ba lada ki paidbah ka Mylliem konstitwensi ki ïohi ïa ki kam kiba u la leh, kin sa bishar hi maki bad kin ai ka rai.
Haba kylli halor ka bor pisa ka treikam ne em ha katei ka konstitwensi, u Bah Hamlet u la ong ba kane kadei tang ka jingkren kutlad namar ha kaba khadduh hi kidei ki paidbah ka konstitwensi kiban jied ïa u ne ka briew. U la ong ba ki paidbah ka Mylliem konstitwensi ki long kiba stad bad kajuh ka jingkyrshan kaba ki la ai ha kine ki snem ba la dep mynta ka kynti ruh kin sa ai biang kajuh ka jingkyrshan ïa u.
