SHILLONG:
U Samla Anver Medon Pariat u wei na kiba samla uba don ka jingthmu ban ïakhun ïa ka ilekshon ka ban wan na East Shillong constituency u la ong ki paidbah ki dei ban tip naei ki seng saiñpyrthei ki ïoh pisa ban ïakhun ïa ka elekshon.
“Ngi kum ki paidbah ngi dei ban tip ba ki don ki bor kiba nadien kiba teh lakam ïa ka lyngba ka jingnoh synñiang kaba ki ai,” ong u samla Pariat.
Dang shen une u samla u ba don jingthmu ban ïakhun ïa ka elekshon na East Shillong u la pyllait paidbah ïa ka jingthoh kaba ïadei bad ka pisa kaba ki ïoh jingïarap bad ka jingpynlut ïa ka pisa.
“Ngi shna bad ai jingkheiñ haba ïadei bad ka jingïoh ïa ka pisa bad ka jinglut sha ki paidbah namar ngi kwah ban pynpaw ïa ka jingkhuid bad ban pyntip sha ki paidbah ba ïa ngi ym don da ki wei pat ki ban teh lakam bad shah khanglad,” u la ong.
Haba ïadei bad ka jingdon ki nongkhaïi ban ïakhun ilekshon, u la ong ha ki por ba mynshuwa ki don bynta ha ki seng saiñpyrthei hynrei mynta ïa ki la kheiñ kor haduh ba ka jingïakren ka dei beit ha ka bor jong ka pisa.
“Bun ki mat kiba sah teng da ki bun bun snem, namar ka pisa ka dei ka pdeng duh ha ki mat politik jong ka jingsniew ki surok, ka jingpait jong ki pipe um, ka jingbymtreikam jong ki light ha surok, ïa kine la shuh ieh hadien. Ngi shim tang ka pisa,” u la ong.
U la ong ba kane ka long ka jingma ha kane ka juk ba mynta bad ki paidbah nongshong shnong kim dei ban sngap jar halor kane.
U la bynrap ruh da kaba ong, ba ïa ka bor jong ka pisa la dei ban ïakhun pyrshah, u la ai jingmut ban don da ka ‘constituency clinics’.
Hangne u Pariat u la ong ba hadien kato katne por ki paidbah kin ïoh ka lad ban buh jingkylli ïa ki nongmihkhmat bad ki dei ban ai ka jubab.
Haba kylli la ki paidbah jong ka jylla ki sngewthuh haba ïadei bad ka politik, ula ong ka don ka jingïadei hapdeng ka jingnang jingstad bad ki nongthep vote bad kumno la pyrshang ban teh lakam.
U la bynrap da kaba ong, ki nongïalam seng saiñpyrthei ha ka por ilekshon ki sam ei sha kum kine ki briew bad ki shah ïalam bakla ngat ha ka jingeh.
Na ka liang u samla Pariat u don ka jingngeit kaba skhem ba ki samla, kiba mynta ki la don ka jingsngewthuh haba ïadei bad ka Politik bad u don ka jingkyrmen ba kan don ka jingkylla.
Haba ïadei bad ka jingïoh kam ïohjam, u la ong ka don ka jingdonkam ban thaw lad ban ai kam shabar na ki kam sorkar.
U samla Pariat u la ong ka ‘cooperative sector’ ka dei ka wei ka lad ban ai kam ai jam, u thrang ba pynkylla ruh haba ïadei bad ka rep ka riang bad ka ri jingri.
Haba ïadei bad ka jingmih jong u ban ïakhun ïa kane ka ilekshon pyrshah ïa ka Kong Amapreen Lyngdoh, u la ong ka don ka jingbym sngewtynnad na ki paidbah haba ïadei bad kane ka MLA ba mynta. U la ong ba ha ka jingleit ïalap ilekshon jong u da kaba rung na ka wei ka ïing ha ka wei pat, u lap na ki nongthep vote ba ki don bun ki mat kiba dang shahteng haduh mynta.
Ha kaba nyngkong u samla Pariat u thmu ban ïakhun na ka New Dawn Meghalaya hynrei katkum ki tyllong khubor kiba u nongthoh u ïoh, la ïoh jingtip ba u lah ban ïakhun ïa kane ka elekshon ka ban wan na ka ‘the Voice of the People Party’.
