SHILLONG:
U Nongaiktien ka Voice of People Party (VPP) u Bah Batskhem Marboh, u la ong ba ka jingsngap mynthi ka sorkar pdeng ban ai ïa ka jingdawa Inner Line Permit (ILP) sha ka jylla ka dei namar ka jingbym skhem ki seng saiñpyrthei ha ka jylla ki ba shiphang ki la kyrshan bad shiphang ki la kyntait ïa ka ILP.
Haba kren sha ki lad pathai khubor ha ka 12 tarik Nohprah, u Bah Batskhem u la ong ba ki sorkar naduh mynshwa kim kwah ïa ka ILP, la ka dei ka Congress kaba la kdew ba ka ILP kala rim katba ka UDP ka kwah ïa ka ILP ka ban pynthymmai bad ka NPP ruh kam kwah hynrei da ka jingpdiang ïa ka CAA ka pynlong ïa Seng saiñpyrthei ba kin dawa ILP.
“Kane ka jingkyrngah bad ka jingkohnguh ki seng saiñ pyrthei ka la pyntlot lupa ïa ka jingdawa ILP ha ka jylla, ki seng saiñ pyrthei ki ju kdew ba ka jingdawa ILP ka dei tang ka jingdawa ki Seng bhalang, bad kane ka pyntlot bad ka don ka jingshim kabu na ka sorkar Pdeng”, u la ong.
“La weng ïa ka Khasi Jaiñtia Hills District na ka preamble jong ka Bangal Eastern Frontier Regulation 1873 ne ka ILP, kaba la kdew ba ka jylla Meghalaya kan ym don shuh ha ka ILP bad kane ka dei ka jingleh bakla jong ki seng saiñ pyrthei, bad kane ka la pyneh shibun ïa ka jingïoh ïa ka ILP ha ka jylla”, u la bynrap.
U Bah Batskhem u la ong ruh ba ka Sorkar Pdeng la 3 snem tam naduh ba pdiang ka ïing dorbar thawaiñ ïa ka rai halor ka ILP, ka khlem ai kano kano ka jubab, kane ka mut “Em” bad um tharai ba ka BJP kan shimkhia ïa kane.
U la ong ruh khlem da don kano kano ka jingshimkhia na ka jylla, ka sorkar pdeng kan ym sngap bad ka jingïoh ka jylla Manipur ïa ka ILP ka dei namar ki seng saiñpyrthei ha Manipur naduh u snem 2016 ki kyrshan beit ïa ka ILP.
“Hynrei ha ka jylla Meghalaya, ka Congress kam treh ILP, ka BJP kam treh katba ha Manipur ka don ka jingkwah ban don ILP katba ha Meghalaya ka rai lang jong ki Seng saiñ pyrthei ka long ban ym donkam ILP, lait noh tang ka Modified ILP lane ka ILP kaba la pynbha, dei na kane ka daw ba ka jingdawa ILP ka tlot bad ka BJP ka shu kylla ïa kyrshan ïa ka ILP hadien ba la pdiang ïa ka CAA”, u la bynrap.
U Bah Batskhem u la ong ba kawei ka daw ba ka sorkar pdeng kam shim khia ban ai ILP ïa ka Meghalaya ka long namar ba ïa ka CAA la dep ban pynlait lupa na ki jaka ba don ka khyrnit ba hynriew ne ka Sixth Schedule bad lada pynïasoh ïa ka CAA bad ka ILP, kane ka la pynsting ïa kane ka jingdawa bad ka jingbakla ki seng saiñ pyrthei ka long ba ki la shim sting ïa ka jingdawa ILP.
