MAWSYNRAM:
Ka United Democratic Party (UDP) jong ka Mawsynram konstitwensi ha ka 28 tarik Kyllalyngkot ka la plie paidbah ïa ka ophis treikam jong ka ha Mawsynram ha kaba u Bah Renikton L. Tongkhar u la ot ïa u ribon ban plie ïa kane ka ophis ryngkat ka jingïadon lang u Bah Ollan Sing Suiñ u ba dei u kyrtong ka UDP na ka Mawsynram konstitwensi ryngkat ka jingïadonlang ruh ki samla ki longkmie bad ki riew rangbah jong kane ka thaiñ.
Haba kren ha kane ka sngi u Bah Renikton u la ong ba ka jingplie ïa ka ophis treikam jong ka UDP ha Mawsynram kan long ka jingsah jingkynmaw namar ba ka UDP kala i don jingkylla namar ba ki paidbah kiba wan ha ki jingïalang kim dei ki briew kiba ap tang ban ïoh sha ïoh ja ne ïoh jingmyntoi ei ei na ki kyrtong bad lada ki paitbah kim ieid bad ai jingkyrshan ïa u Bah Olan Suiñ ki paidbah kim wan haduh katne mynta ka sngi ha kane ka jaka.
“Mynta ngi tip bha ki kyrtong kiba ïaleh pyrshah ïa u Bah Suiñ ki dei ki kyrtong ki ba bit ba biang nadong shadong ban da dei ki paidbah kiba kwah ban ïoh jingmyntoi kim wan ban kyrshan ïa u Bah Suiñ “, la ong u Bah Renikton.
Shuh shuh u la ong ruh ba ka jingwan pynïasoh ki rangbah bad ki longkmie sha ka UDP kan dei ka jinghikai ba kan wanrah ïa ka jingkylla hapoh jong ka Mawsynram konstitwensi bad lada u Bah Suiñ un jop ha kane ka elekshon na ka Mawsynram konstitwensi, ka pyrthei bad ka Meghalaya baroh kawei kan tip ba ka Mawsynram konstitwensi ka bym shaniah ha ka bor jong ka pisa, la ong u Bah Renikton.
Hadien ka jingplie ïa ka ophis treikam, la ïoh ruh ban pynlong ka jingïalang ba lyngkot ban pdiang burom ïa ki nongkyrshan ba thymmai na kiwei pat ki seng kiba la wan pynïasoh ialade sha ka UDP Mawsynram Circle ha kaba u Bah Ollan Sing Suiñ ula pdiang burom ïa ki da kaba pyngpyndeng ïa ka muphlor jong ka seng.
