NONGPOH:
U Bah Mayralborn Syiem, uba la shah jied biang kum u MLA ka Nongpoh ha ka sien ba-ar, u la ai ka jingkhublei kaba kyrpang eh na bynta ki paidbah ka Nongpoh konstitwensi hi baroh kawei, namar ba ki la ai biang ka jingkyrshan ïa u bad ba u la poi sha ka thong jong ka jingjop ha kane ka jingjied ïa ki nongmihkhmat sha Ïing Dorbar Thawaiñ.
Haba kren sha ki lad pathaikhubor, u Bah Mayralborn Syiem, u la pynpaw ïa ka jingsngewkmen kaba khraw eh, namar ba ki paidbah ki la jied biang ïa u ba un long biang kum uta u Nongmihkhmat na Nongpoh ha ka sien ba-ar, kata ka long ba wat haba ha u snem 2018 u la jop na ka Party Congress, hynrei ha une u snem uba mynta, haba u la ïakhun na ka Party UDP, pynban ki paidbah ki dang ai hi ïa kata ka jingshaniah kaba pura eh ïa u.
U Bah Mayraldborn Syiem, u la pynpaw ruh ba hadien ba ki paidbah ki la jied biang ïa u kum u Nongmihkhmat, u kwah eh ban pynurlong ïa ki jingthmu kiba u angnud na bynta ka Ri Bhoi, kiba kynthup ïa ka Medical College, ka Northern Ri Bhoi College ba kan nang kiew irat, ka Industrial Training Institute, ka C&RD Block ha Umden lem bad kiwei.
U Bah Mayraldborn Syiem, u la kyntu ïa ki paidbah ba nangne shakhmat ba kin nangai ïa ka jingkyrshan bad ka jingïatreilang bad u kum u MLA, khnang ba baroh ki jingthmu ban wanrah jingkylla na bynta ka Nongpoh konstitwensi lem bad ïa ka Ri Bhoi hi baroh kawei ba kan urlong.
