SHILLONG:
Ka liangpyrshah ka la ther ïa ka sorkar jylla khamtam halor ka jingbym paw eiei ki jingtreikam ban tehlakam ïa ka jingwan buhai shnong beaiñ ki briew nabar sha kane ka jylla.
U MLA ka Congress na Umsning u Dr. Celestine Lyngdoh haba wanrah ïa kane ka mat ha ka 21 tarik Lber hapoh ka ïing dorbar, u la ong ba ha ka jingïapynbeit pud hapdeng ka Meghalaya bad ka Assam, ym dei ban ktah ïa ki jaka kiba khlem don kano kano ka jingïakajia. U la ong ba ha Maikhuli, ka jaka ba ïaknieh ka dei ka lum jingtep hynrei ka jaka kaba khlem don jingïakajia kaba don ka pung dohkha, la aiti sha Assam ka bym don jingïakajia eiei.
“Lada dei ban ïabujli, ym dei ban ai ïa ka jaka ka bym don kano kano ka jingïakajia”, la ong u Dr. Celestine.
U la kdew ruh ïa ka jingtreikam jong ki pulit ka jylla ha kaba ïadei ban ïakhun pyrshah ïa u drok. “Lada ki pulit ki tbit ban kem drok tang khyndiat ruh, ngam sngewthuh balei kim lap ban kem ïa ki trok 16 shaka kiba kit 30 ton kiba ïaid ha surok myn sngi. Balei kimlap ban kurup ïa kine ki trok”.
“Hato ki pulit ki lah ban jied ha kano ka bynta ki pyni ba kiba tbit, lane ha kano ka bynta kim kwah ban long kiba tbit. Lada ki tbit ha baroh ki liang, balei kim lah ban lap ïa ki trok kiba heh?” la ong u Dr. Celestine.
U la ong ba ka sorkar jylla ka ong ba kam don ka jingshalan dewïong beaiñ bad ki paidbah kim lah ngeit namar ba man ka sngi la ïohi ïa ki spah trok ba ïaid kit dewïong ha surok.
Ha kajuh ka por, u la ong ba ha ka jingkren u Lat u khlem kdew ïa ka jingwan buhai shnong beaiñ ki briew nabar, ïa ka jingshngaiñ ki paidbah ha khappud, ban pynbha ïa ka pule puthi ha ka kyrdan ba shajrong, ban pynbha ïa ka tnad ka koit ka khiah, ka jingphiel ka tnad bording ka MeECL, ka jingpynslem ban sdang ïa ka Medical College, ka jingbym don ka jingshai ha ka jingtreikam ka sorkar, ka jingphiel ka skhim sam um Jal Jeevan Mission (JJM), ka jingshah iehbein ki Asha bad nongtrei Agwanwadi.
