SHILLONG:
U MLA bad MDC barim ka Mawlai konstitwensi, u Bah Embhahlang B Syiemlieh u la ther ïa ka seng thymmai, ka Voice of the People’s Party (VPP) da kaba ong ba kadei ka seng kaba kylla sur.
U la ong haba ki wan ha Mawlai ki ong para Khasi, ngi ieid jaidbynriew kyrshan ïa ngi, yn da poi ha konstitwensi ba don u Garo ki ong paralok Garo ngin peit na ka bynta ka jingmyntoi ka Jylla Meghalaya, ynda la poi ha ka jaka ba don ki Mizo bad ki Naga ki kylla sur biang para North East, bad ynda poi ha Pynthorumkhrah ki kylla sur biang namar u kyrtong ka VPP ha katei ka konstitwensi u kren da ka Ktien dkhar ban khroh vote, bad da poi ha katei ka konstitwensi ki ong para nong India.
“Ka jingkylla sur jong ka VPP ka pynartatien ïa ka mynsiem bad ïa ka jingieid ri ka jong ki, bad ym don ka jingshaniah ïa kane ka party,” la ong u Bah Embhah.
U Bah Embhah uba dei u adviser jong ka NPP ha Mawlai u la ther ruh ïa u Bah Ardent M Basaiawmoit ba ha u snem 2014 ba u long CEM u kwah ban wanrah ïa kawei ka Bill ban pynkylla ïa ka riti ka dustur jong ka jaidbynriew ba ïa ki khun dei ban ai jait noh sha ki shynrang.
Ki paidbah ka Mawlai Nongkwar ki la ïa risa ban pynpaw ka jingkyrshan ïa u kyrtong ka National People’s Party (NPP), u Bah Teiborlang Pathaw ha kaba da ki spah ngut ki nongshong shnong ka Mawlai nongkwar ki la mih ban sngap ïa ki nongrim jong une u kyrtong.
Haba kren ha kane ka jingïalang kaba la long ha Mawlai Nongkwar u la pynpaw ïa ki nongrim ba u don na ka bynta ban shakri ïa ki paidbah, bad kawei na ki nongrim ba u la buh hakhmat ka long ban pynduh jait ïa u drug na katei ka constituency, nalor kiwei ki kam pynroi bad ki policy ban kyntiew ïa ki samla.
U Bah Teibor uba dei ruh u MDC ka Mawlai u la kiar ban kynthoh ïa ki kyrtong kiba ïaleh pyrshah, hynrei u la pynshai pat ïa ki jingkynnoh jong kiwei ki kyrtong pyrshah ïa u.
Haba pynshai ïa ka jingkynthoh u kyrtong ka UDP, u Bah PT Sawkmie uba la ong ba u Bah Pathaw um nang ban kren phareng. U kyrtong ka NPP uba la pyndep ïa ka jingpule B.A (Hons. English) u la kob syndon ïa u MLA barim ba un buh ïa ka jaka bad ka por ban ïatai nia da ka ktien English.
Ha kaba ïadei bad ka jingkynthoh u kyrtong ka seng Congress, u Bah Marbud Dkhar uba la kynnoh ba ka NPP ka la thied ïa 3 ngut ki nongïalam kiba dei ki kyrtong ha ka election u snem 2018 na ka liang u Bah Pathaw u la ong ba ïa kine ki nongïalam u la thied da ka jingieid, bad ther ruh ïa utei u kyrtong ba ïakhun pyrshah da kaba ong ba lada um pat kot ka jingmut jingpyrkhat um pat long uba bit ban ïakhun ïa ka elekshon.
