SHILLONG:
U kyrtong ka Bharatiya Janata Party (BJP) na North Shillong konstitwensi u Bah Mariahom Kharkrang u la pynpaw ïa ka jingsngewskhem ban poi sha ka thong da kaba ong ruh ba ka North Shillong ka dei ka jaka ka BJP.
U Bah Kharkrang u la thep kyrteng ha ka 6 tarik Rymphang kum u kyrtong ka BJP na North Shillong konstitwensi. “Nga sngewskhem ba ngin jop, ka North Shillong ka dei ka jaka ka BJP, to da kynmaw ïa kane”, la ong u Bah Mariahom Kharkrang bad ong ruh ba ha ka elekshon ba lahdep ki la shah pynliem kumba 300 vote, hynrei mynta ka kynti kin jop donburom.
U la pynpaw ruh ïa ki saw tylli ki mat ba hakhmat eh ba u wanrah sha u paidbah ba kin jied ïa u kum u nongmihkhmat jong ki, kata ka pule puthi, ka koit ka khiah, ka ïohkam ïohjam bad ka shong shngaiñ bad baroh ki jingtrei jong u kin long halor kine ki saw tylli ki mat bad kumba long u Bah Ransom, u Bah Kharkrang ruh um kwah ban kynthoh ei ei halor ka rukom treikam u MLA barim ka North Shillong u Bah Adelbert Nongrum.
U Bah Kharkrang u la pynpaw ba ka dawbah ba u shim ïa ka shongsuk shongsaiñ kum ka mat ba ha khmat eh ka long namar lada ymdon ka jingshong shngaiñ ha ka jylla, ka jylla hi kan nym kiew.
U la ai nuksa ba ngi hap ban shaniah ha kiba nabar ban bei pisa ha kane ka jylla jong ngi khnang ban lah ban pyndap ïa ka jingbymbiang kam ki samla ha ka jylla. “Kum kane ka rukom long rukom man kaba mynta ha ka jylla, nga artatien ba kin don kiba kwah ban bei pisa ha ka jylla jong ngi”.
Haba kylli halor kiba bun ki jingkynnoh bamsap ka BJP ïa ka sorkar MDA hynrei ka ïai snoh ha kane ka sorkar khlem pyllait, u Bah Kharkrang u la ong, “Ki nongïalam ha ka jylla ki la kwah ban weng noh na ka sorkar, hynrei ki nongïalam na ka sorkar pdeng ha ka jingstad jong ki, ki sngew ba lada ka seng ka dang don hapoh ka sorkar ki dang lah ban pynïaid ïa ka sorkar ban ïa kaba shu ieh ïa ka sorkar marwei”.
Kumban shu pynkynmaw ba ka jingïoh tiket u Bah Kharkrang ka la pynlong ïa u Bah Michael Kharsyntiew uba dei uwei pat u kyrtong ba ïaknieh tiket na ka BJP, ba un shim noh da ka rai ban ïakhun kum u kyrtong shimet. Kane ka pyni ba ka la don ka jingïapait hapdeng ki briew ka BJP, kata hapdeng ki nongkyrshan u Bah Kharkrang bad u Bah Kharsyntiew.
Haba kylli na u Bah Kharkrang shaphang ka jinglong jingman hapoh ka BJP, kaba pyni ruh ïa ka dak jingïapait namar ka jingmih u Bah Kharsyntiew sha khmat ban ïakhun kum u kyrtong shimet, u Bah Kharkrang u la ong, “Ka BJP kam dei kata ka iing kaba pait ba pra. Ki nongtrei ka BJP kin sah beit ki nongtrei ka BJP”.
Haba kylli pat halor ka jingkynnoh ba ka don ka jingthied tiket ha ka seng BJP, u Bah Kharkrang u la ong, “Phi hap ban kylli ïa kito ki briew kiba thied, namar ngam pynlut wat shi pisa ruh”. U la ong ruh ba u ïoh ïa kane ka tiket halor kiba bun ki nongrim ba ka seng ka la buh bad ba um pynlut wat shi pisa ruh halor kane ka tiket bad ka jingïoh jong u ïa ka tiket ka long beit halor ka jinglah jong u ban leh bha.
Haba kylli shuh shuh la u don ryngkat bad u Bah A.L. Hek ba lada ki wan ha ka bor ban wanrah da ka CBI ban tih bniah halor ki kam bamsap ha ka jylla, u Bah Kharkrang u la ong ba ïa mynta um kwah ban kren ei ei halor kane hynrei kin sa ïa peit ynda la wan ha ka bor.
Haba kylli ruh shaphang ka jingong u Bah Hek ïa ka sorkar BJP ha baroh ar (sorkar jylla bad sorkar pdeng) bad ïalade kum u kyrtong Myntri Rangbah, u Bah Kharkrang u la ong ba u lah ban kren halor ka sorkar BJP ha sorkar jylla bad sorkar pdeng, namar lada kane kan urlong kin lah ban wanrah ïa shibun ki kam pynroi kiba dang sahteng ha kine ki 50 snem, hynrei ban ong ïalade kum u kyrtong MR, u Bah Kharkrang u la ong ba um tip ei ei.
