SHILLONG:
Ki katto katne ngut ki nongshong shnong ka Mawsynram konstitwensi, ki la kynnoh ba u MLA barim ka Mawsynram konstitwensi u Bah Himalaya M Shangpliang u la pyndonkam bakla ïa ka MLA skhim bad ïa kane la tip lyngba ka RTI.
Kine ki nongshong shnong ka Mawsynram konstitwensi ha ka 11 tarik Rymphang ki la wan ban pynpaw paidbah ïa kane ka kaiphot RTI kaba la wad da u Bah Wanlambok Khar Lyngdoh na ka shnong Mawkasai .
Haba kren sha ki lad pathai khubor u Bah Abadfaith Kharaswai, na ka shong Mawpen u la ïathuh ba “Ka jingwan jong nga hangne mynta ka sngi ka long hadien ba nga la ïoh jingtip ïa ka jingmih ka kyrteng jong nga ha ka thup kyrteng ki nongïoh jingmyntoi na ka MLA Skhim”.
“Haba nga la ïoh jingtip nga dap da ka jingsngew lyngngoh namar ka kyrteng jong nga ka don ha kane ka thup kyrteng kat ba nga khlem ïoh ïa kata ka pisa,” u la bynrap.
Na ka liang ka Kong Aidalin Dkhar, ka nongkitkam barim ka BJP Mahila Committee na Mawsynram ka la ong “ka jingmih kyrteng jong nga ha ryngkat u para jong nga ka long ka ba lyngngoh namar ba ngi khlem ïoh ïa ka pisa”.
“Ha ka thup kyrteng na ka bynta ka MLA skhim, na ka bynta ban seng dukan, ka la mih ka kyrteng jong nga ka Aidalin Dkhar bad u para jong nga u Shanboklin Dkhar hynrei ïa ka pisa ngi khlem ïoh,” ka la bynrap.
Ka la ong, “Halor kane na ka liang jong nga, nga la leit phah da ka message sha u Bah Shangpliang ban pan ïa kane ka pisa hynrei u khlem jubab eiei bad nga la leit ruh ban pynkynmaw hynrei u sngap jar jar”.
“Kane ka pisa ka long T.20,000 kawei ka kyrteng bad ka kyrteng jong nga lei ha kane ka thup kyrteng ka mih haduh lai tylli. Ngam tip shaei ka don kat ba ïa ka pisa bad kat kum ka RTI ba ngi la ïoh ka paw shai ba u Bah Shangpliang u la dep ban sei ïa kane ka pisa,” ka la bynrap.
U Bah Deralson Dkhar, u la ïathuh ba u dei u briew u ba ïajan bha ïa u Bah HM Shangpliang ha ki por mynshwa hynrei mynta naduh ba u MLA barim u la pynïasoh sha ka seng BJP u la iehnoh ïa u namar ba um mon ïa kane ka seng.
U Bah Dkhar u la ïathuh ba u la ïoh ïa kane ka RTI na u Bah Wanlambok Kharlyngdoh u ba shong basah ha ka shnong Mawkasai bad u la leit ban kylli bad pyntip ïa ki nongshong shnong kane ka thaiñ ban tip la ki ïoh ne em ïa kane ka skim.
“Nga la leit ban ïakynduh ïa ki nongshong shnong ki ba la mih kyrteng ha kane ka thup MLA skhim bad sngewlyngngoh ba bun na ki ki khlem ïoh ïa kane ka skhim,” u la ong.
“Kat kum ka RTI ka paw shai ba ïa ka pisa la dep ban pynlait lut bad kane ka pisa na ka bynta u snem 2018 haduh u snem 2022,” u la bynrap.
