SHILLONG:
U nongïalam ka liang pyrshah u ba dei ruh u kyrtong ka Trinamool Congress (TMC) na Songsak bad Tikrikilla, u Dr Mukul Sangma ha ka 21 tarik Rymphang u la kynthoh ïa ka sorkar Meghalaya Democratic Alliance (MDA) hapoh ka jingïalam ka seng National People’s Party (NPP) halor ka jinglute ïa ka man tyngka kaba Rs 140 klur da kaba thied ïa ka jaka ba 807 akar ha Mawpdang Mawkhanu, East Khasi Hills district.
Haba kren sha ki lad pathai khubor ha ka ophis jong ka seng TMC ha Shillong, u Sangma u la khot ïa ka sorkar MDA ka “Meghalaya Deceitful Alliance” lane ka sorkar synrop ba shet shukor jong ka Meghalaya halor ka jingshukor jong ka ïa ki nongshong shnong jong ka shnong Mawpdang Mawkhanu da kaba ki la thied ïa ka jaka na ki agent khyndew ha ka dor kaba T 85 shi sq.ft kaba kot baroh T 298.98 klur, katba ka dor trai ka long T 45 shi sq.ft katba kot baroh T 158.28 crore, ka jingïapher ba haduh T 140.7 klur.
U la ïathuh ruh ba ka rai ban thied ïa kane ka jaka la shim da ka kynhun myntri jong ka sorkar jylla ha ka 4 tarik Risaw 2021, u Sangma u la kynnoh ruh ba u Myntri ka tnat Urban Affairs u la lam khmat ïa kane ka projek kaba la pdiang hadien da u Myntri ka tnat Revenue & Disaster Management bad ruh da ka kynhun myntri ka jylla.
“U Myntri Rangbah ka jylla bad ki Myntri ka tnat Urban Affairs bad ka tnat Disaster Management ki la ïasylla sniew ban lute ïa ka jylla haduh T 140 klur,” la ong u Sangma, bad u la bynrap ruh ba kane ka sorkar ka la pynrung ïa ka jingngeit ba ka jingbamsap ka long kaba kongsan ha Meghalaya.
“Ki ïadonkti ha ki kam ban lute ïa ka jylla, ban pynhun ïa ka jinglalot jong ki,” la ong u nongïalam ka TMC katba u dang kyntu ïa u Myntri ka sorkar pdeng, u Amit Shah, ban shim khia ïa kane ka case kaba u la khot ka “Meghalaya Land Scam”.
“U Myntri ka sorkar pdeng u la kynnoh ba ka jylla ka la shlei ha ka jingbamsap bad u la kam ruh ba ka jylla Meghalaya ka dei kawei na ki jylla kaba bamsap tam ha ka Ri hi baroh kawei, kaba la pynjahburom ïa ki paidbah ka jylla,” u la bynrap.
U Sangma u la banjur ba la dei ban pynlong da ka jingtohkit bad u kyrmen ruh ba ka sorkar pdeng kan pdiang ïa kane ka case bad ban phah ïa ka agency ban tohkit halor ki jingkynnoh watla u la kam ba ki don shibun ki sakhi sabut.
