SHILLONG:
U Vice-President ka All India Trinamool Congress (AITC) ha ka jylla Meghalaya, kaba dei ruh ka seng saiñ pyrthei ha ka liang pyrshah, u Bah George Lyngdoh, ha ka 21 tarik Ïaïong u la kyntait ïa ki khubor hamsaïa ba ka la don ka jingïasngewthuh jingmut lypa ba ki kyrtong ka seng kin don ha ka seng tang haduh ba la kut ka elekshon bad ba kin pynïasoh noh bad ka Bharatiya Janata Party (BJP) hadien ka elekshon.
U Bah Lyngdoh u la ong, “Ki lah ban don ki khubor hamsaïa hynrei ngi ïakhun ïa ka elekshon 2023 da kawei ka jingmut, kawei ka mat, kawei ka thong ban pynthikna ba ka TMC kan wan ha ka bor, bad namar ba ngi dei ka seng kaba dang thymmai, la pynkhreh tang hapoh 6-7 bnai hashwa ka elekshon. Ngi la pynïeng haduh 56 ngut ki kyrtong bad kane ka pyni shai ïa ka jingthmu jong ngi.”
Haba kylli halor ka jingshah rem ki nongïalam kiba kongsan jong ka TMC, u Bah Lyngdoh u la ong, “Ka jingshah rem ki nongïalam kiba kongsan ka long ka jingkhanglad na ka bynta kano kano ka seng.”
