SHILLONG:
Hapdeng ki khubor hamsaïa ba ka United Democratic Party (UDP), ka seng kaba ar ha ka jingbun dkhot ha ka sorkar synrop ka MDA hadien ka National People’s Party (NPP), kan sa shah weng noh na ka sorkar, u Myntri Rangbah ka jylla u Conrad K Sangma ha ka 16 tarik Jymmang u la kyntait ïa baroh ki khubor hamsaïa bad u la ong ba ha ki san snem ba la dep, ka UDP bad ka NPP ki la ïatrei ryngkat bad kin ïai leh ïa kata.
Ha ki katto katne taïew ba la leit, khamtam ha ka jingïalap elekshon ha Sohïong dang shen, bun ki nongïalam ka NPP ki la ai ksai ba ka UDP ka lah ban shah ïehnoh sharud.
“Bun kiei kiei la kren ha ka por elekshon. Hynrei hadien ka elekshon, ngi ïa treilang bad nga kwah ban ban ba ngi la ïatrei ryngkat san snem ban rah shaphrang ïa ka jylla bad ngin ïai leh ïa kata da kajuh ka mynsiem,” la ong u Sangma.
Haba kdew ba ka jinglong ki elekshon ka long ba ki seng saiñ pyrthei ki ai jingkren bad don ki por ba ym shym la lah ban tehlakam ïa ki kyntien, u Sangma u la ong, “Hynrei kum ka sorkar synrop, ngi la ju buh ïa ka jingmyntoi ka jylla kham hakhmat.”
Haba kylli la kiba kum kita ki jingkren kin ktah ïa ka sorkar synrop MDA, u Myntri Rangbah u la jubab em, “Lada kan ktah ïa ka sorkar synrop, ka la dei ban ktah ïa ngi ha ka elekshon 2023. Ka la don ka jingïakawang ktieh bad ki jingkynthoh kaba jur ha ka por elekshon, hynrei la katta ruh ka sorkar synrop ka neh khlem khih,” u la bynrap.
