SHILLONG:
U MLA ka Trinamool Congress (TMC) na Songsak, u Dr Mukul Sangma, ha ka 21 tarik lber u la ong ba ka ïingdorbar thawaiñ ka la dei ban wanrah da ka rai (resolution) na ka sorkar, ban kyntu ïa ka sorkar India ban ai ïa ki sakhi sabut halor ki kam bamsap hapoh ka jylla, ïa kiba la kam bad kynthoh da u Myntri Rangbah ka Ri u Narendra Modi bad u Myntri ka kam Pohïing ka Ri u Amit Shah, mynba ki la wan jngoh ïa ka jylla ha u bnai Rymphang mynta ka snem.
U Sangma u la ïashim bynta ha ka jingïatai kaba lyngkot kaba la sdang da u MLA ka North Shillong u Bah Adelbert Nongrum halor ka jingkynnoh da ki ar ngut ki nongïalam ka Ri ba ka jylla Meghalaya ka long ka jylla kaba bamsap tam.
“Lada don kino kino ki dak ba kaba kum kata ka don, ai ba ka sorkar India kan leh ïa kaba donkam ban tohkit halor kita ki kam bamsap khnang ba ngi, lada ngi khuid, ngin long kiba lait na ka jingpynrem bad ka jylla ruh kan laitluid na kata ka dak sniew,” la ong u Sangma.
Haba ong ruh ka bamsap ka pyndkhoh bad ka kham sniew shuh shuh ban ïa ki kam pyntriem, u nongïalam ka TMC u la ong, “Ka bamsap ka lah ban pyndkhoh ïa ka jylla bad kan ktah ïa ki pateng kiban wan. To ngin ym kheiñ sting ïa kane ka bynta. Nga kyntu ïa ka sorkar hapoh ka jingïalam u Myntri Rangbah, namar ka long kaba dei ba kane ka ïingdorbar thawaiñ kan pdiang ïa ka rai (resolution) na ka sorkar.”
U la bynrap shuh shuh ba kiba don ha ka bor ki dei ban shim khia ïa kino kino ki dak halor ka jingbamsap, “namar ka long ka jingkitkhlieh kaba la bynshet ha ngi, da ka rai u paidbah, ban shim khia ïa ka kamram kaba wan haba ngi don ha ka bor bad ha ka shuki.”
