SHILLONG:
Ka United Democratic Party (UDP) ka kyrmen ba ka jingsngewlem kan ïarap ban pynjop ïa ka shuki jong ka Sohïong konstitwensi, ha kaba la pynsangeh ïa ka elekshon namar ka jingkhlad kyndit u kyrtong ka seng uba long ruh u riew rangbah ha ka saiñ pyrthei, u Bah HDR Lyngdoh.
U President ka UDP u Bah Metbah Lyngdoh, ha ka 3 tarik Ïaïong u la ong ba ka jingsngewlem kan long ka jingmyntoi ïa ka seng bad u la pynpaw ruh ïa ka jingsngew skhem ban jop ïa ka shuki na Sohïong. U la bynrap ruh ba katkum ki tyllong khubor na konstitwensi, kiei kiei baroh ki ïaid ban kyrshan ïa u kyrtong ka seng.
“Ha kane ka kynti ngin pynthikna ba ka UDP kan wanphai biang khnang ban pyni ïa ka jingsngew nguh jong ngi ïa u Bah HDR Lyngdoh (bam kwai ha dwar u Blei) namar ki jingnoh synñiang jong u sha ka konstitwensi bad ruh ïa ki kum ka ïing ka sem ha kito ki snem mynba u dang long u MLA ka Sohïong,” la ong u Bah Metbah Lyngdoh.
Kumban shu pynkynmaw, ka Election Commission ka India (ECI) ka la buh ïa ka 10 tarik Jymmang kum ka tarik na ka bynta ka elekshon ha Sohïong konstitwensi bad ka jingkheiñ ïa ki vote kan long ha ka 13 tarik Jymmang.
