SHILLONG:
U kyrtong ka National People’s Party (NPP) u Bah Hamletson Dohling na ka Mylliem konstitwensi hashwa ban pyndep ïa jingthep vote u la ai khublei ïa ki paidbah ka Mylliem ba kin ai biang sa shisien ka jingkyrshan ba un wan biang ha ka bor.
Haba kren sha ki lad pathai khubor u Bah Hamletson Dohling u la ong ba u don ka jingkyrmen ban jop donburom biang ha kane ka kynti namar kadaw hi ka long ba ki paidbah jong ka Mylliem konstitwensi ki la ïohi ïa ka jingtrei shitom bad ki jingpyrshang ka jong u ban wanrah ïa ka roi ka par ha kane ka konstitwensi.
U Bah Hamletson u la ong ba u don ka jingkyrmen bad ki briew ka Mylliem konstitwensi ki long ki briew kiba stad, ki briew kiba don ka jingkitkhlieh na ka bynta ka imlang ka sahlang.
Ha kaba ïadei bad ka jingkynnoh ïa ka party NPP, u Bah Hamletson u la ong ba ki paidbah ki tip bha ïa kane ba ha kine ki san snem kiba la leit bun ki party kum ka People’s Democratic Party (PDF), United Democratic Party (UDP), HSPDP bad kiwei ki donlang bad ka sorkar Meghalaya Democratic Alliance (MDA) ba la ïalam da ka NPP hynrei mynta namar ba kim don shuh bad kane ka sorkar ki la kynnoh beit tang ïa ka. U la ong ba ki paidbah ki tip bha ïa kane baroh.
Hashwa kane u Bah Hamletson u la leit ban ai khublei ïa ki paidbah nongwan thep vote jong katei ka konstitwensi bad ki paidbah ruh ki la ai ka jingkitbok kitrwiang ïa u ba un jop biang ha kane ka kynti.
Lah ban kdew ba hadien ka jingwan thep vote jong ki paidbah ka Mylliem konstitwensi ka long 68. 36 percent.
