SHILLONG:
U MLA ka UDP na ka Khliehriat Constituency, u Bah Kyrmen Shylla u la ong ba kano kano ka skim ka dei ka jong u paidbah bad ki party kim dei ban kam ïa kine ki skim namar ba ki skim la mang khnang na ka bynta ka bha ka miat jong ki paidbah ha ka jylla.
Haba kren bad ki lad pathai khubor ha ka 20 tarik Nohprah, u Bah Shylla u la ong ba ki paidbah haba ki ïoh ïa kano kano ka skim ki dei ban pdiang ban pyndonkam bha ïa kata namar ki skim ki dei na ka bynta ka jingmyntoi jong ki nongshong shnong ha ka jylla.
Hynrei ha ba don ka jingtrei ka ju don ka jingkynnoh bad ki paidbah ki dei ban sngewthuh ba ka jingkynthoh jong kiwei ki party pyrshah ïa ka skim u la wanrah da u Myntri rangbah ka jylla ka dei ka ban pynmyntoi ne ka ban war jingeh ïa ki bad lada ka long kumba ki kynnoh ki wei ki party ki paidbah hi ki dei ban ai ka jubab ha u ne u snem 2023.
U Bah Shylla u la ong ruh ba ïa kano kano ka skim yn ym lah ban kam da ka no kano ka party ruh namar ka skim ka dei ka hok jong u paidbah bad lada ka NPP ka kam ba ka dei ka skim jong ki, kane ka bakla shibun bad ki paidbah ki dei ban bishar ïa kata.
“Katkum ka jingïohi jong nga, kino kino ki nongïalam ki ba ju trei ïa ka kam, ka ju don ka jingshah kynnoh bad jingshah kynthoh hynrei nga kyrpat ïa ki paidbah ban peit ai ki kam ba kum ki MLA ki la dep ban leh ha kine ki 5 snem namar ba ka jylla ka donkam ban im”u la ong.
“Ngan buh ruh ka jingkyrpat ïa u paidbah ba kim ailad ïa ka UDP, ba kan ïoh bat ïa u lakam shynshar ha kane ka elekshon 2023 khnang ba ka party kan ïoh ban ai ka jingshynshar ka ba bha ïa ka jylla”, u la bynrap.
