SHILLONG:
U kyrtong ka Voice of People’s Party (VPP) uba dei ruh u President u Bah Ardent M Basaiawmoit u la byrngrem ba lada ka VPP kan ïoh synshar ha u 2023 da ka jingïalam lynti u paidbah un sa tohkit lut ïa ka jingpynlut pynsep jong kane ka sorkar ïa ka pisa jong u paidbah.
U la kren siat ruh ba katto katne por u la don uta u khun riewspah, ba u ong ba u kwah ban leh bha ïa ki briew kiba duk namar ba u Blei u la kyrkhu ïa ka ïing jong u, “Hynrei mynta nga ïohsngew ba kita ki nongïalam ki ong ba haba la ïarap u briew te hap ban kyrshan em, haba la leh bha u briew te hap pyrkhat em”.
“Nga la ïohsngew ba ula sdang ban ai bad sam ruh ki jait jingai sngewbha sha ki paidbah hynrei mynta pat nga la ïohsngew ruh ba kita ki nongbud jong u kila leit rung sha kito ki longïing ba u sam jingïarap ban pan ka jingkyrshan” la ong u Bah Ardent.
U la buh jingkylli hato ka dei shisha ka jingai sngewbha ne ka jingthied vote, lada dang don sa uwei pat u briew nadien uba wan kyntur hadien ka jingnoh sngewbha.
“Haba phi ong ban ai sngewbha te ki paidbah ki hap ban leit shim ïa ka jingïoh sngewbha hynrei mynta kumno kine ki briew jong u khun riewspah ki nud ban leit rung thliew ïing ban pan jingkyrshan na ki paidbah” la buh jingkylli u Bah Ardent.
U Bah Ardent ula ong ba une u khun riew spah udei ban pynshai lyngba ki lad pathai khubor, la kadei ka jingai sngewbha ne kadei ka jingthied naka bynta ka Vote.
Ïa kane u la kren ha ka jingïalang paidbah kaba la pynlong ha Smit mynta ka sngi. U la ong ba watla ka VPP kam lah ban pynieng kyrtong lut hynrei u la kop ba lada ka UDP kaba don 7 ngut ki MLA ka lah ban khyrwait shabi ïa ka sorkar, ka VPP lada kan jop baroh 15 kan eh aiu.
U la kynthoh ïa u MLA ka Mawhati konstitwensi u Bah Dasakhiat Lamare da kaba kren biria ba u long thik kum u lok ba mar shu dep ïathoh, ka lok ka dang pun khun 2- 3 bnai, une u la leit ïaluh samla shawei.
U la ong ba ki paidbah ka Mawhati ki la kwah ïa u Bah Ardent ba un wan pynlong jingïalang sha katei ka thaiñ bad ki la maham ba lada ka Nongkrem ka dang ngop ha u, kin sa wan ba nyngkong ha ka jingbiej.
U Bah Ardent u la bynrap ba ki briew ka Nongkrem ki dei kiba la shai ka jingpyrkhat bad kan long ruh ka nuksa kaba bha ïa kiwei pat ki konstitwensi.
U la kynthoh ruh ïa kane ka sorkar mynta ba ka jingthied vote ka la long thamula ha kaba ka jingai jingïarap jong ka sorkar ïa ki nongrep wat ha sor ruh ka noh jingïarap nongrep, bad u la buh jingkylli haei kita ki nongrep ha sor.
U la kop ruh don ar jait ka politik kaba jakhlia bad kaba khuid. U la kam ba ka VPP ka kren bad kan ïaid da ki kam kiba dei bad kiba bha ym ha ka thok ka shukor bad ka jingpynbiej paidbah.
“Kumba kren uwei na ki nongïalam jong ngi, ba ong ba ngi pynbiej man ka 5 snem u paidbah ruh u ngop man ka 5 snem”, u la ong.
“Nga kop ïa kiba ong ba ym lah ban pynkhuid ïa ka politik, mynta ngin sa ïa peit mano ban jop, ngin pynkhuid ïa ka politik namar ba ka VPP ka leit sha u paidbah tang da ka jingpyrta ym ka pisa” la ong u Bah Ardent.
