SHILLONG:
U Symbud Myntri Rangbah ka jylla u Bah Prestone Tynsong u la ong ba ka jingwan ïuh kjat jong ka nongïalam ka All India Trinamool Congress (AITC) ka Mamata Benerjee sha ka jylla Meghalaya kan dang pyntlot bor shuh shuh ïa ka party bad ka jylla kan hiar arsut lada ka AITC kan wan ha ka bor.
Haba kren bad ki lad pathai khubor , u Bah Tynsong u la ong ba ka jingwan ka Mamata Benerjee kan dang pyntlot shuh shuh ïa ka AITC ha Meghalaya, bad lada ka AITC kan wan ha ka bor kan don ka jingkylla bad ka jingkylla kan long ba ka jylla kan sa hiar arsut lada ki kyrshan ïa ka AITC.
“Lada ki paidbah kin kyrshan ïa ka AITC, ka Meghalaya ha ka jaka ba kan kiew, kan ngam bad hiar arsut sha poh, kane ka long namar ba ka Mamata Benerjee kam pat tip halor u Dr Mukul Sangma hynrei u Bah Prestone Tyngsong u ba la don lang la 8 snem ha ka shuki bad ki paidbah ki tip bha ïa u”, u la bynrap.
U Bah Tynsong u la ther tyngeh ruh ïa ki nongïalam ka All India Trinamool Congress (AITC), na West Bengal halor ka jingwan mushlia jong ki ïa ki mat jingeh ha ka jylla Meghalaya. Lah ban kdew hangne ba ki nongïalam ka AITC na West Bengal, kynthup ïa ka Chairperson ka AITC ka Mamata Benerjee, u National General Secretary ka AITC u Abhishek Benerjee bad u Nation Spokesperson ka AITC u Saket Gokhale ki la wan hiar ha ka 13 tarik Nohprah sha ka jylla Meghalaya ban pynkhlaiñ ïa ka party na ka bynta ka election 2023.
Haba jubab halor ka jingkren ka Nongïalam ka AITC halor u pud u sam u Bah Prestone u la ong, “hato ka Mamata ka sah ha jylla Meghalaya ne ha jylla Assam, bad namar ba ka dei ka khlieh duh ka AITC ka hap ban kren kumta hynrei khlem ka jingïamynjur lang na baroh ki ar jylla yn ym don mano mano ruh ba lah ban pynbeit ïa kane mat”.
Halor ka jingkynnoh ba ka sorkar ka shim sting ïa ka jingjia Mukroh, u Bah Tynsong u la ong, “mar sien jia u Myntri kampohïing u Bah Lahkmen Rymbui u la hiar shatei, u Myntri rangbah ka jylla u Conrad K Sangma ryngkat ki kynhun myntri ki la leit bad ngi la leh ïa ka ba donkam ban leh bad ka jingïarap ïa ki ba mynsaw ngi la leh, ka sorkar kan dang bishar ban dang pynheh shuh shuh ïa ka pisa jingïarap sha kiba khlad bad la bthah ruh ïa ka tnad Political ban wad lad ban thung kam ïa kiba haïing halor kane ka sorkar ka dang bishar mynta”.
“Kum ka khlieh duh jong ka jylla West Bengal nga kwah ban kylli shwa kumno ka pynïaid ïa ka sorkar ha West Bengal, ngi hangne ngi don ki kyndon jong ka Executive rule, kaba ai bor katkum ki kyrdan jong ki minister bad kata ka jingkylli ka bym don nongrim bad tang ba ki dei kita ki nongïalam national ki lah ban kren katba mon”, u la bynrap.
Halor ka jingkynthoh u Saket Gokhale u Bah Tynsong u la ong, “ngam kwah ban ong eiei ïa ki jingkynthoh jong u, balei ngan pynlut ka por bad u briew u bym donkam donjam bad ngim tip haduh katno u ieid ïa ka jylla Meghalaya, bad u dei na kaei ka jylla bad ka jingkren jong u ka long kumba u dei na ka jylla Meghalaya”, u la bynrap.
“Ngam ju ïohi ïa u National spokesperson u ban shu kynthoh khlem nongrim khlem da lah pat ban wanrah ïa ki sakhi sabud ruh hynrei tang ban shu ïoh kynthoh ba ka MDA ka dei ka sorkar ba tuh, ngam don eiei ban ong hynrei ngi la shah teh shah khum da ki rule jong ki Executive Rule bad ka jingkynthoh ka dei ka bym don nongrim”, la ong u Bah Tynsong.
