SHILLONG:
U President ka UDP uba dei ruh u MLA ka Mairang u bah Metbah Lyngdoh u la ong ba lada ka Mairang konstiwensi ka synshar ka pisa, kata ka dei ka jingsdang ka jingjot.
Haba kren ha ka jingialang ha Manai ha kane ka Sngi Saitjain u bah Metbah u la ong, “Lada ka Mairang ka la donkam noh da ka pisa ban synshar, kata ka dei ka jingsdang jong ka jingjot ha ka konstitwensi ha baroh kawei. Nga ieh noh ha phi”.
U la bynrap, “Na ka liang jong nga, ngan da ngan ker ïaphi lada wan ka bor pisa katto katne ruh, ngan don ryngkat bad phi, ban ym ailad ïa ka bor jong ka pisa”.
U la ong ba ha kane ka elekshon ba dang shu dep shen, ka jingioh vote ka UDP ka la kiew sha ka 8 hajar shiteng na kaba mynshwa bad kane ka wan lyngba ka jingtrei shitom jong baroh.
U President ka UDP u la ong ba naduh 2008, u sngew skhem ban ïakhun ïa ka elekshon bad kaba nyngkong ka long ba lada u don ka jingartatien ki paidbah ruh ki artatien. Ha kine ki saw tylli ki elekshon, um dei ba kwah rhah ïa ka bor, kam dei ba u kwah ban kamai na kane ka kam, kam dei ba u kwah kum ka jingbishni iano iano ruh bad kam dei ia kano kano hynrei ka shong ha kaei kaba u Blei ia ka bynta.
“Shwa ban shim ia ka rai ha 2008 ban iakhun elekshon, kam shym la pynkohnguh ia nga wut wut hynrei nga ap kumba 2 bnai shwa ban shim ia ka rai, ban don ka rukom sngewthuh kaba kham shai ba ka dei ne em ka bynta kaba dei ban wan sha nga bad lada kam long nga, ngeit skhem ba ngan ym rai ha kata ka por”, u la ong.
U la ong ruh ba um kwah ban kren pyrshah ne ban bein iano iano hynrei ka Mairang ka donkam ia kaei kaba ki nongialam ban shah shkor. Ha kine ki saw tylli ki elekshon, la mad ia ki result elekshon kiba pher bapher bad ha ki elekshon kiban wan kin khampher.
“Ha ka elekshon MDC 2019 ngi la mad ia ka jingshah rem bad ngi la mad ia ka jingjop. Ngam tip kaei kaba phi sngewthuh ia ka jingshah rem ha 2019”, u la ong.
U la ong ba ka 2019 ka long ka jinghikai ba dei ban wad ia ka daw ka jingshah rem. Halor kane ka elekshon ba dang shu dep, u la ong, “Ngi dei ban pyrkhat ia kane ka jingtam 155 vote, hato ka dei ka jingtheh umpjah ne ka jingai mynsiem iaphi. Nga sngew kum u nongialam ba kane kam dei ka jingtheh umpjah hynrei kan ai mynsiem ba ngin trei ar shah lai shah. Ka jingjop kan ym wan khlem ka jingtrei shitom”, u la bynrap.
