SHILLONG:
U President ka Voice of the People Party (VPP) u Bah Ardent Miller Basawiawmoit ha ka jingïalang ba la pynlong ha ka shnong Mawpat ha ka 20 tarik Kyllayngkot, u la ong ba lada ki paidbah kin ai ka jingkyrshan pura ïa ka VPP, kan sa sei madan ïa baroh ki kam bamsap jong ka sorkar Meghalaya Democratic Alliance (MDA).
Haba kren ha kane ka jingkren u Bah Ardent u la ong ka snem 2018, ka dei ka snem kaba dap tang da ka jingïakhih suda, la ka dei halor ka ILP, ka mat Themmetor, ka CAA bad ka don ka jingbym shong suk shong saiñ, ka ba la ktah jur ïa ki nongbylla.
“Lada ki sorkar kin jin da kren ïa ka mat jingïada ha ïingdorbar thawaiñ, ka jylla jong ngi kan ym don shuh kano kano ka jingïakhih bad lada ha u snem 2023, ruh kim lah ban rah ïa kine ki mat hapoh ka ïingdorbar, ka jingïakhih ka ba jur kan nang jia nangne shakhmat”, u la ong.
“Don ki ba kynnoh ba kane ka sorkar MDA ka dei ka sorkar ka ba bamsap tam na baroh ki sorkar ha ka jylla, hynrei ïa kane mano ban tih khlem da don ka jingkylla ha ka synshar khadar, na kata ka daw ngi la seng ïa ka VPP ban wanrah ïa ka synshar khadar kaba khuid, bad ngin ïakhun pyrshah ïa ka bamsap khnang ban wanrah ïa ka jingkyrmen ha ki jaitbynriew”, u la bynrap.
U President ka VPP u la kynnoh ruh, “Ka sorkar MDA kam lah ban pynbiang ïa ka jingdonkam u paidbah namar ba ka ong ba kam don pisa, ka la shim da ka ram ban pynbiang ïa ka bording, ka la shim da ka ram ban siang surok, bad ka ba sngew shyrkhei ka long mano ban pynkhuid ïa kata ka ram”.
“Ngi donkam ïa ka jingkylla ha ka synshar khadar bad ban tehlakam ïa ka jinglutphut, ka sorkar halor bym lah ban pynkhlaiñ ïa ka pla tyngka, ka la pynlut phut sa da ka ba thung Chairman siew da ki lak tyngka, thung ïa ki nongaijingmut siew da ki lak tyngka, ïa ki IAS ophisar ki ba la shongthait dang thung kam, ban thaw kam pat ïa ki samla ym don pisa”, u la ong.
U la bynrap “Mynta ki sdang sa ban pynthame paidbah ïa ki paidbah da ka ba kam trai ïa ki skim sorkar India, ki kob ki kam bad pynkiew skong ïa ki kyrtong na ki party jong ki, ba dei na ka jingtrei shitom u MLA u MDC ki pynïoh ka roi ka par ha kane ka thaiñ” .
U Bah Ardent u la ong ruh, “Mynta ha ka jylla kin don ar kynhun ki ban ïakhun ïa ka elekshon, kawei ka long ki kynhun ki ba kwah ban ïakhun ïa ka elekshon da ka jingpyrkhat ba ka politic ka dei ka kam kyntang kaba khuid katba kawei pat ka kynhun ka ong ba khlem thok, khlem shukor, khlem pynthame, khlem tuh kam dei ka politic”.
“Ha ka por Covid ki kam ba ki la pynlut T. 800 klur hato ki paidbah kin pdiang ïa kane ka jingkam ka sorkar MDA , ka VPP kan ym pdiang ïa kane bad lada ki paidbah kin ai ïa ka bor ban synshar ka VPP, kan sei madan lut ïa ki ne ki kam bamsap jong ka sorkar ba la dep”, u la bynrap.
U la kdew, “Ngim dei ban jied nongmihkhmat da ka ba leh matlah da kaba don jingsngew. Teng teng ki ong namar ba ngi ba ju kyrshan ka Congress lada kane ka seng kan buh kyrtong da u thlong ruh ngin jied beit, un leh aiu uta u thlong, sangeh noh ïa kum kata ka jingpyrkhat, ka VPP ka dei ka party ka bym pat don kano kano ka jingthoh bria, bad ka don ïa ki nongïalam kiba angnud ban ai ka jingsynshar kaba bha”.
U Bah Ardent u la ong ruh, “Mar sien pynbna ba ka VPP kan buh ïa ki kyrtong ki ban kynthup ïa ki nonghikai, ka sorkar ka la pynmih ïa ka jingbthah ban ym shah ïa ki nonghikai ban shim bynta ha ka kam politic, hynrei ngi la ujor mukotduma pyrshah ka sorkar bad ngi la jop, ka sorkar ka duh thiah duh dem haba ka peit ïa ka VPP”.
