SHILLONG:
U MLA ka Pynthorumkhrah konstitwensi u Bah Alexander L. Hek u la ong ba ha baroh ka elekshon ka pisa ka treikam beit tangba kino kino kiba shah thied lane kiba die ïa la ka jong ka vote na ka bynta ka pisa shi junom kin sa pisa sah.
Kane ka jubab hadien ka jingkylli ba hato ka bor pisa ka treikam ne em ha ka por elekshon, u Bah Hek haba jubab ïa ka jingkylli sha ki katto katne ki lad pathai khubor u la kubur ba ka don ka jingpyndonkam pisa ha ka por elekshon hynrei ka shong ha ki paidbah ïano kin jied namar ka vote ka dei kaba kordor haduh katta katta.
“Ka vote ka dei ka bor jong ngi namar ka vote jong ngi ka aibor ïa ngi, kano ka sorkar ban long, mano ban long ki nongialam ïangi hadien habud”, la ong u Bah Hek.
U Bah Hek u la ong ba lada ki paidbah ki vote ïa uno uno u nongialam ki dei ban vote da ka jingsngewthuh ym ban vote tang da ka jingshah pynbeit ha ka bor pisa.
“Lada ngi vote ïa uno uno u nongialam ngi dei ban vote da ka jingsngewthuh bad da ka jingtipbriew tipblei. Ngim dei ban vote tang na ka bynta ka pisa bad lada phi vote tang na ka bynta ka pisa shi junom phin sa pisa sah”, la ong u Bah Hek.
Haba kylli ha kawei pat ka liang halor ka jingmih bun jong ki seng na kawei ka elekshon sha kawei, u Bah Hek u la ong ba ka jingmih bun jong ki seng na kawei ka elekshon sha kawei ka pyni shuh shuh ïa ka jingpait jingpra jong ka jaitbynriew. “Ka jingmih bun ki seng na kawei ka elekshon sha kawei ha ka saiñ hima sima ka pyni shuh shuh ïa ka jingpait jingpra jong ka jaitbynriew jong ngi”.
U Bah Hek u la ong ba ki seng saiñ pyrthei bapher bapher lada ki ieid ruh katno katno ruh hynrei ynda la dep ka elekshon kidei kijuh suda.
“Baroh ki seng saiñ pyrthei lada dei ki National Party, ki seng Riewlum ne kiwei kiwei ha ka por elekshon baroh ki ieid jaitbynriew lut hynrei yn la dep elekshon kidei kijuh suda”, la ong u Bah Hek.
Ha kawei pat ka liang halor ka skhim FOCUS, u Bah Hek u la ong ba ka skhim FOCUS ka la kylla long ka skhim National People’s Party (NPP) lane ka skhim jong ki kyrtong NPP (NPP candidate skhim) bad ïa kane ka skhim la shim ram na ka World Bank. U la ong ba kane ka skhim FOCUS la shu sam beit da ki kyrtong ka NPP bad kane ka pyni ba ki la pyndonkam bakla ïa ka pisa jong u paidbah.
“La pyndonkam ïa ka pisa jong nga jong phi da kaba pynkylla sha ka Political shkim lane ka party skhim. Ka long kaei kaei kaba sngewsih.
U Bah Hek u la ong, “Ym ju dei hi ruh ban don ka National Party na kane ka jylla Meghalaya barit namar ka National Party ka pisa baroh la hap lum lut baroh na state jong ngi ban pynlut sha Manipur ban pynlut sha Nagaland, sha Sikkim, sha Goa bad sha kiwei, da ka pisa jong u paidbah ka jylla Meghalaya. Tang ka jingmih (resource) ngim don, kat ka National Party ka shu lute beit na ka jylla jong nga bad leit theh lut sha ki jylla bapher bapher ka Ri India”.
Ha kaba ïadei bad ka skhim “WE CARD” lane ka “MYE CARD” u Bah Hek u la ong ba kane kadei tang ka jingpynbeij jong ka seng All India Trinamool Congress (AITC) sha ki paidbah ka jylla Meghalaya. U la ong ba ïa kum kine ki skhim la dep ban pyntreikam ha West Bengal mynshwa. Ha West Bengal ki pynkhreh ïa kane ka skhim da ka mang tyngka jong ka jylla baroh kawei bad 3 percent ki ai ïa kane ka shkhim bad ïa kane ka skhim 3 percent shiteng la lah ban leh lane pyntreikam tang 3 bnai bad ki sa pynduh noh pat ïa ka. Mynta ki kwah pat ban pynbeij sa ïa ki paidbah ka jylla Meghalaya bad ïa kane ka skhim kin ym lah da lei lei ban pyntreikam ïa ka”.
U Bah Hek u la buh ka jingkylli, “Hato lada ki kwah ban pyntreikam ïa kane ka skhim “WE CARD” kin wanrah ka mang tynga na West Bengal ban pyntreikam ïa kane ka skhim ha jylla Meghalaya, lah ba long kumta? Ka mang tynga ka jylla Meghalaya baroh ngi dang ap lut na ka sorkar pdeng, ngim don jingmih ei ei, ngim don revenue lajong bad kin ïoh pisa naei ban ai ïa kane ka skhim sha ki paidbah”.
U Bah Hek u la ong ba kane ka long tang ka buit politok ban pynbeij ïa ki paidbah bad u la kyntu ïa ki paid ka jylla Meghalaya ba kim dei ban beij da lei lei ruh.
