MAIRANG:
U kyrtong jong ka seng Congress uba dei ruh u sitting MDC jong ka Mairang Konstitwensi, u Bah Batskhem Ryntathiang ula pynpaw, “Ngam don ka jingkhuslai shaphang ka 2 tarik ïa ka result ban pynbna namar ba lada ngi pynleit jingmut palat ïa ka burom bad ka bor ngin ym lah ban kren ïa ka jingshisha, bad kaei kaba ngi leh kan long kaba arsap”.
Shuh shuh ula bynrap ruh, “Ngi rung hangne ban tbeh ïa ka jingshai bad kan eh au ïa phi lada ngi kular mynta bad lada ngim shym lah ban long kumta hato ha ka 2028 phim lah ban weng ïa ngi? Ngim kwah ban shong sah hangne lada ngim lah ban long ki jingmyntoi ïa phi ki paidbah.”
Ïa kane na ka liang u Bah Batskhem Ryntathiang ula pynpaw haba kren ha ka jingïalang paidbah kaba la pynlong ha ka 25 tarik u Rymphang 2023 da ka Mairang Block Congress Committee ha madan Mot Tirot Mairang Mission, ha kaba la wan ban sakhi lang da ki hajar ngut ki nongkyrshan jong ka seng.
