SHILLONG:
U Vice President jong ka Meghalaya BJP, u Bernard Marak uba la ïoh jamin na ka bynta baroh ki jingshah ai mukotduma, u la kyndong kti pyrshah ïa u Myntri Rangbah ka jylla, u Conrad K. Sangma da kaba ong, “Lada u Myntri Rangbah u nud shisha, ai un wan ïakhun elekshon na South Tura”.
Hadien jong kane ka jingïoh jamin jong u Bernard Marak, u President jong ka Meghalaya BJP, u Bah Ernest Mawrie u la ong ba u Bernard Marak u la shah ai mukotduma khlem kano kano ka jinglah ban pynshisha bad kita ki jingleh baroh ki dei ki jingleh kiba mih na ka saiñ hima sima. U Bah Mawrie u la ong ba ki nongïalam ka jylla ki tieng ïa ka jingkiew jong u Bernard Mawrie ha South Tura.
“U Bernard Marak u la lait mynta ka sngi na ka byndi jong ki pulit, hadien ka jingïaksaid kaba shyrkhei”, la ong u Bah Mawrie.
U Bah Mawrie u la ong ba lada u Myntri Rangbah u kwah ban tip katno u Bernard Marak u khlaiñ, u lah ban wan ïa khun elekshon na South Tura, ym na kiwei pat ki jaka. U President jong ka Meghalaya BJP u la ong ba ki paidbah ki la dep shim ïa ka rai jong ki ïano kin jied na Tura bad ha Meghalaya hi baroh kawei.
U Bah Mawrie u la kyntu ïa Bernard Marak ba u dei ban bteng ïa kita ki jingtrei jong u kiba long ban ratdyngkhong ïa ki kam bamsap. U Bernard Marak u la shah kem ha ki pulit ha u Naitung mynta ka snem bad shah pynngat ha ki aiñ jong ka POCSO bad shah kynnoh ba u pynïaid ïa ki kam awria na ka jaka rep jong u kaba don ha Rimpu Bagan ha Tura.
