MAWSYNRAM:
Ka Meghalaya Pradesh Trinamool Congress (TMC) ka la sdang ban suhthied sa ha Mawsynram konstitwensi, ha kaba la sakhi mynta ka sngi, ïa ka jingwan da ki spah ngut ki paidbah sha ka jingïalang ba la pynlong ha Seng Khasi Dorbar Hall Dongneng, ha ka shnong Mawsynram East Khasi Hills District.
Ha kane ka jingïalang paidbah la don ki nongïalam ka Party TMC jong ka Mawsynram Block Committee kynthup ïa u bah Batskhem Marbaniang, Bah Gilbert Kharraswai bad kiwei de ki samla, ki riew rangbah bad ki dkhot kiba ïadonbyntalang ban lum, ban lang ïa ki paidbah jong ka Mawsynram konstitwensi.
U bah James Lyngdoh Vice President jong ka Meghalaya Pradesh Trinamool Congress u la ïoh ban pynshai paidbah halor ki mat treikam jong ka party. “Watla ka dang dei ka party kaba dang lung ha kane ka jylla, hynrei la ïohi mynta ba lah jan baroh ki jaka jong ki konstitwensi bapher bapher hapoh jong ka jylla, ka TMC ka la sdang ban suhthied bad ki paidbah ki la sdang ban sngewthuh bad ai ka jingkyrshan ban wan shakhmat ban pynïasoh ïalade bad kane ka party,” la ong u James.
Shuh shuh u la ong ruh ba tang kane ka TMC kaba lah ban ïaleh pyrshah ïa ka party BJP kaba synshar mynta ïa ka Ri India baroh kawei. “Ka TMC ka don ka thong kaba hakhmat eh ban wanrah ïa ka jingkylla ha ka synshar khadar kaba khuid da kaba sngap ïa ki jingdonkam u paidbah ba bun balang ym ban synshar donbor marwei,” la bynrap u James.
U la ong ruh ba ka TMC ka dei ruh ka seng ka bym ju ñiew shilliang khmat ïano ïano ne ïa ka jingsngew ïapher niam, hynrei ka ïaleh ban pynwandur, ban pynlaitluid ïa ki jaitbynriew baroh, la ha kano kano ka jingngeit ne ha ka niam ka rukom.
Na ka liang u bah Gilbert Kharraswai, Secretary ka TMC Mawsynram Block Committee, u la ong, “kane ka sorkar MDA, ba la lam khmat da ka NPP, ka la long shisha ka sorkar kaba pynkhihwin ha baroh ki liang, ha kaba ïadei bad ka synshar, khaddar; shibun ki jingeh kiba la mih. Lah mih ruh shibun ki jingïakhih kiba ngi lah sakhi ha kine ki snem bad ki bnai ba la dep. Kane ka la pynlong ïa ki khun samla jong ka dong ka thaiñ Mawsynram ba kin phai khmat sha kane ka Party TMC, bad dei tang kane ka party kaba lah ban weng ïa baroh ki jingeh, ym tang ha ka jylla Meghalaya hynrei wat ban ïeng ïaleh pyrshah ruh ïa kiwei pat ki ‘National party’, kum ïa ka BJP kaba la synshar mynta ïa ka Ri India hi baroh kawei.
Namarkata, ha kaba ïadei na ka bynta ka Mawsynram konstitwensi, ka Party TMC ka la nang pynkhlaiñ shuh shuh ban pynsngewthuh ïa ki paidbah bad shen kan sa pynlong ki jingïalang paidbah ban lum, ban lang ïa baroh ki paidbah hapoh jong ka konstitwensi bad na ka liang ka party Mawsynram Block Committee kan sa sei madan ïa u kyrtong ban ïa aireng ha kane ka elekshon MLA 2023, napoh ka Mawsynram konstitwensi East Khasi Hills District.” Ïa ka jingïalang la pynïaid da u bah Ïohdor Diengdoh, ha ka jingïadonlang ruh u bah James Lyngdoh, Vice President jong ka TMC Meghalaya bad kiwei de ki riew rangbah, ki nongkitkam ba hakhmat jong ka Party.
