MAWKYRWAT:
Hadien ba la pynbna ïa ka tarik thep vote jong ka elekshon MLA sha ka ïing dorbar thawaiñ ka jylla, u District Election Officer, South West Khasi Hills District ha ka 19 tarik Kyllalyngkot u la lum bad la thaw ïa ka Standing Committee ban pyntreikam ïa ka aiñ Model Code of Conduct (MCC) ha ka district. Ha kane ka jingïalang ha Mawkyrwat la don lang ki dkhot jong ki seng saiñ pyrthei bapher bapher.
U DC u Bah T. Lyngwa uba long ruh u District Election Officer ka South West Khasi Hills District u la pyntip ba la pyntreikam ïa ka Model Code of Conduct bad la phah ïa ki kynhun ban weng noh ïa ki Poster bad lama kiba wah harud surok da kaba batai ruh ba lada kwah ban wah lama ha ki ïingbriew dei ban ïoh ka jingbit na ki trai bad ym shah ban wah lama ha kano kano ka jaka ba dei jong ka sorkar bad lada ki kwah ban wah lama ne sticker ha ki kali kin hap ban pan jingbit na ki Returning officer jong ki 2 tylli ki konstitwensi.
Ha kajuh ka por u la ïathuh ba la buh ïa ka Video Surveillance Team ban peit ïa ka jingkheiñ ka jingdiah halor ka jingpynlut pynsep jong ki kyrtong bad ba ka jingpynlut baroh jong uwei pa uwei u kyrtong ha kane ka elekshon kam dei ban palat ïa ka 28 lak tyngka bad kin don ki Expenditure Observer ki ban khmih halor kane ka bynta. U la ïathuh ruh ba shwa ba kin shon ïa ki poster, pamphlets, manifesto, pynmih cassette bad kiwei kiwei da uno uno u kyrtong kin hap ban ïoh shwa ka jingmynjur na u District Election Officer bad ka syrnot na ka Media Certification and Monitoring Committee ba la thung ha ka distrik bad dei ban don ka kyrteng jong ka Printing Press lym kumta yn ym shah ban pyndonkam.
Shuh shuh u la batai ba ym dei ban pynlong ïa kino kino ki jingïalang ha ki jaka sorkar ne ki skul sorkar bad haba ki don jingthmu ban pynlong jingïalang ki dei ban ai jingtip shisngi (24 kynta) shuwa ryngkat bad ki prokram khnang ba kan ym mih kano kano ka jingpynthut.
Ha kaba ïadei bad kito kiba la kynjoh 80 snem palat ha ka rta, kiba don jingduna ha ki dkhot met bad kiba ïoh pang Covid, ka Election Commission ka la pynbeit da ki Postal Ballots khnang ban pynshlur ïa ka jingwan ïashim bynta jong kiba bun ki nongthep vote. Nangta u la ong ba ki jingthoh (appeal) kim dei ban pynthohbria ne ktah matïong ïano ïano ruh bad lada don kino ki jingbym biang yn khot ïa ki na ka bynta ban pynbeit bad pynbit pynbiang bad lada don kino kino kina ki jingpynshai ki dei ban pyntip ïa ki Returning Officer lane ki lah ban phone sha u District Election Officer khnang ba kane ka election kan long kaba ïaid beit ïaid ryntih.
Ha kajuh ka por u la pynkynmaw ba la buh da ki CCTV bad web casting ha ki Polling station bym don internet connection bad kito kiba rah pisa palat ïa ka 50 hajar tyngka yn knieh bad kito ki briew kiba shah knieh ki hap ban don ka jingpynshisha halor ka jingdonkam jong kata ka pisa. La pynshai ruh halor ka dor ba la buh na ka bynta baroh ki tiar kynthup ïa ki kali ba kin pyndonkam ha ka por elekshon.
U Bah I. Lawryniang EAC, BDO, ARO ka 36-Mawkyrwat konstitwensi u la ai jingbatai halor ka jingpyntreikam ïa ka Model Code of Conduct.
