MAWKYRWAT:
Ka Trinamool Congress (TMC) jong ka Mawkyrwat block ha ka 2 tarik Rymphang ka la ïoh ban pynlong ka jingïalang paidbah tang jong ki longkmie na kylleng ki jaka jong ki shnong hapoh ka Mawkyrwat konstitwensi kum shi bynta ban pynsngew ïa ki katto katne ki mat treikam jong ka seng bad kumno ban pynkhlaiñ ïa ki jingtreikam naka bynta ki para longkmie ha Madan jong ka skul Nativity H.S Skul Mawkyrwat.
Ha kane ka jingïalang paidbah la ïadonlang naduh u kyrtong jong ka TMC Mawkyrwat konstitwensi, u Bah Sounder Strong Cajee, ka Kong Kathleen Marbaniang, Vice President ka Kong Mary Tiewla, Joint Secretary Mahila jong ka seng TMC Shillong.
Ki longkmie haba kren ha kane ka sngi kiba ki la ban jur ba donkam ïa ki nongïalam kiba don ka bor halor lade, ki nongïalam kiba bha, kiba stad bad ki nongïalam kiba don ka jingkitkhlieh. Ha kajuh hi ka sngi ka TMC Mawkyrwat Block ka la ïoh ban pdiang burom ïa u Bah Diverland Lyngdoh ban long u nongkyrshan ba pura jong ka party naduh mynta ka sngi ryngkat ka jingsakhi lang jong ki paidbah nongkyrshan. Shuh shuh ka la ïoh ruh ban pynkup burom ïa ki ar ngut ki longkmie kiba dei ki nongmareh kiba la wanrah ka nam ka burom ïa ka dong ka thaiñ, ka ri bad ka jaidbynriew baroh kawei ïa ka Kong Kmoiñ Wahlang na Shngimawlein bad ka Kong Snora Lyngkhoi na Nongbah Marshillong.
Ha kane ka sngi la pynshit pynshngaiñ shuh shuh lyngba da ki jingshad bad ki jingrwai na ki katto katne ki unit kiba hapoh jong ka AMPTCP Mawkyrwat Block ryngkat ki paidbah ki longkmie kiba wan ban sngap ïa ka jingpynshai na ki nongïalam ba hakhmat jong ka TMC jong ka Mawkyrwat Konstitwensi.
