SHILLONG:
Ka MLA barim ka East Shillong konstitwensi ka Kong Ampareen Lyngdoh ka la ong ba lyngba ka MLA skhim ka la lah ban ïarap ïa kiba bun bah ki longïing khamtam kiba duna ka ïoh ka kot.
Ka jingïarap ka kynthup naduh ka jingïarap ïa kiba leit pule, kiba seng kam seng jam lajong khamtam ki longkmie, bad kumjuh ka jingpynpoi um sha ki tyngkong ïing. Ka la lah ban pynbha ïa ki lynti shnong, ïa ki nala, bad kiwei ki jingdonkam ha ka konstitwensi.
Ka Kong Ampareen kaba la iehnoh kam MLA dang shen, kan leit biang sha u paidbah ha kane ka elekshon ban ïakhun na ka NPP.
Haba kren bad ki nongthoh khubor, ka la ong ba ka sngew hun ba ka la lah ban ai ka jingshakri kaba paka sha ki paidbah nongshong shnong jong kane ka konstiwesi.
“Nga sngew hun shisha ïa ka jingshakri jong nga bad nga kyrmen ba u Blei un nang kyrkhu biang ïa nga sa shissien lyngba ka jingkyrshan ba ki paidbah nongshong shnong kin jied biang ïa nga ban long kawei na kita ki nongïasaid lem ha ka sain pyrthei ha ka jylla,” la kam ka Kong Ampareen.
Ka la ïathuh ba na ka MLA skhim ka la lah ban ïarap ïa ki nongshong shnong kum ka baibam ne Scholarship na bynta ki khun samla kiba wan na ka longing baduk.
“Lyngba ka MLA Skhim nga la lah ban peit ïa ki lynti synkien, ban pynpoi ïa ki surok, ki nala kiba biang, ka um bam um umdih ha kine ki snem nga la pynlut bha,” ka la ong.
Ka la ong ba namar ba ha ka konstiwensi kam don ka Jal Jeevan Mission (JJM) skhim, ka la hap ban ïarap lyngba ka MLA skhim ban pynpoi um haduh ki tyngkong ïing jong ki longïing kiba kyrduh um.
Kumjuh ha ka por COVID, ka MHIS kam lah ban bah lut bad ka ïarap ïa ki longing lyngba ka MLA skhim khnang ba kin lait na ka jingshim ram.
