SHILLONG:
U National Vice President ka National People’s Party (NPP) uba long ruh u Symbud Myntri Rangbah ka jylla u Bah Prestone Tynsong, ha ka 2 tarik Rymphang u la kynnoh ba u nongïalam ka liang pyrshah u Dr. Mukul Sangma u la don ka jingïasylla bad ki nongïalam ka Bharatiya Janata Party (BJP) namar u la don ka jingthmu ban mih noh na ka Meghalaya Trinamool Congress (TMC) hadien kane ka elekshon kaban wan.
U la kop ba ka Meghalaya Trinamool Congress (TMC) kan ïoh tang kumba 5 seat ha kane ka elekshon kaban wan.
Kane ka jingkren jong u Bah Prestone ïa u Dr. Mukul ka long hadien ba la don ka jingkynnoh ba u nongïalam ka liang pyrshah u Dr. Mukul Sangma u la don ka jingïasylla ban pynïasoh ïalade sha ka Bharatiya Janata Party (BJP).
Haba kren sha ki lad pathai khubor kane ka sngi, u Bah Prestone u la ong ba ka la don ka jingïapynbeit hapdeng u Dr. Mukul bad ka BJP hynrei um tip kaba kumno. “Kaba nga tip shai kdar ba ka la don lypa ka buit jong u Dr. Mukul bad lada u jop 3-4 ngut un pynïasoh bad ka BJP. Nga tip thikna ïa kata namar ha ka jingïalang paidbah ha Garo Hills, u myntri rangbah ka jylla u Conrad K Sangma u la ai ksai ïa kata”, la kam u Bah Prestone.
U Bah Prestone u la ong ba u Dr. Mukul ba ha kano kano ka por un mih na ka Meghalaya TMC namar u la tip ba ka TMC kan nym ïoh bun ngut ki MLA ha kane ka elekshon ban wan. Ha kaba ïadei bad ka jingkynnoh u Dr. Mukul ba ka NPP ka dei ka Team B jong ka BJP, u Bah Prestone u la kyntait bad ong ba kane kam dei kaba shisha. U la ong ba tang kawei kaba u tip ba hadien ka elekshon u Dr. Mukul un leit pynïasoh ïalade sha ka BJP.
