MAIRANG:
Tang hadien khyndiat kynta ba la dep ka jingñiew vote ha ka jylla Meghalaya, ka jylla kan ap mynta mano ban thaw sorkar, hynrei ka la don ruh ki jingjia kiba sngewsih bad ki bym pat ju jia mynno mynno ha ka history ka jylla, ha kaba la don ka jingïakhih ha kylleng ki jaka namar ka jingshah rem ki kyrtong bad kaba kham sngewsih ka long ba haduh ban da ïap briew. Kane ka jingjia kaba kham heh napdeng ki jingïakhih ba la sakhi ha ki katto katne jaka ka dei ha Mairang, ha kaba la ïathuh ba la don uwei uba khlad na kane ka jingïakhih.
Katkum ki khubor bala ïoh lum la ong ba u wei u briew u la khlad noh hapdeng ka jingïakulmar ha Mairang hadien ba kala don ka jingïatur paidbah sha ophis DC mynta ka janmiet.
Haba pyrshang ban pyntikna ïa kane ka khubor na ka liang jong u SP bad DC ka EWKHD kila ïathuh ba kala don shisha ka jingïap jong u wei u briew hynrei katei kala jia shabar na ka ophis DC bad ïa ka daw jong ka jingkhlad jong u tei u briew ym pat lah ban tip hynrei ïa ka met la rah noh sha Civil Hospital Mairang ban leh ïa ka post mortem khnang ban lap ïa ki jingshisha.
Na ka liang jong u DC u la ong ruh ba kila don haduh 4 tylli ki kali sorkar kiba la shah thang ha ki riew shim kabu.
La ïoh jingtip ruh ba ka jinglong jingman haduh mynta ka dang don hapdeng ka jingsyier hynrei ki bor pulit kila pyrshang ban tem ïa katei ka huri hura khnang ban ïoh wanrah biang ïa ka suk ka saiñ.
Kane ka jingjia ka la jia hadien ba da ki hajar ngut ki paidbah kiba la ong ba kidei ki nongkyrshan ka Seng Congress na Mairang mynta ka janmiet kila tur sha ka ophis u Deputy Commissioner, Eastern West Khasi Hills District halor ka jingkynnoh ba ka jingñiew vote hynne ka sngi kam long kaba beit. Ha kane ka jingjia, la ïoh jingtip ba la don ruh kiba mynsaw.
Katkum ka jingkynnoh kaba la mih na kitei ki paidbah la ong ba ka vote kaba la ïoh kheiñ baroh ha ka sngi thep kata ka 27 tarik u Rymphang kam shymla ïa biang ne ïahap bad ka jingkheiñ bala ïoh katkum ka jingñiew ïa ka vote hynne ka sngi.
Ha kane ka jingmih ki paidbah ban tur sha DC ophis kala mih ruh ka jingklumar kaba shyrkhei ha kaba ki paidbhur kila sdang ban kawang maw ïa ka ophis DC bad thang ruh ïa ki kali kiba don ha phyllaw jong katei ka ophis.
La ong ruh ba hadien ba ka jingïaklumar kala nang jur na ka liang jong ki bor pynïaid District kila phah ruh ban siat pyntieng ïa ki paidbah da kaba siat sha suiñ bad la ong ruh ba ha kane ka jingïaklumar kala don ruh ka jingmynsaw jong ki briew bad ki bor pahara.
U nongthoh khubor jong u Kynjatshai u la ïoh ruh ban ïakren bad u Bah Wilfred Nongsiej DC ka EWKD ha kaba u la ïathuh ba kala don shisha ka jinghukum ban phah siat sha suiñ ban tem ïa u paidbhur bad ym banse ban leh ïa kata ban tem ïa ka jingkulmar.
Halor kitei ki jingkynnoh kiba la mih u DC u la ong ba ha ka jingshisha kamdon kano kano ka jingbynbeit ha kapor ba ñiew vote tad haduh ban dala pynbna ïa u kyrtong u ba jop hynrei kynsan kynsan la shu wan mih ki paidbah ban tur sha ka ophis DC bad sdang mih ki jingklumar.
