NONGSTOIÑ:
Ka jingthep kyrteng jong ki kyrtong ban ïakhun ïa ka elekshon sha ka Ïing dorbar thaw aiñ ka Jylla na Nongstoiñ Konstitwensi, kala ïai bteng ha kaba mynta ka sngi ka 4 tarik Rymphang, ki ar ngut ki kyrtong kila pyndep ïa ka jingthep kyrteng ha khmat u returning officer ka West Khasi Hills district.
Kine ki ar ngut ki kyrtong ki kynthup ïa u kyrtong ka seng United Democratic Party (UDP) u bah Polestar Nongsiej bad u bah Macmillan Kharbani kyrtong ka Trinamool Congress (TMC) bad ka dang dei ka sien kaba nyngkong ïa baroh 2 ngut ki kyrtong ba kin mih madan ban ïakhun ïa ka elekshon na Nongstoiñ.
U kyrtong ka TMC u bah Macmillan Kharbani u la ong ba ka thong ba ha khmat eh ka jong u ka long ban wanrah pat ïa ka synshar paidbah namar ha kine ki snem kiba la dep la i kumba kala duh noh ka jingsynshar paidbah namar ka jingdon kita ki High Level, ban ailad ïa ka rukom thungkam thungjam kaba laitluid bad lada ka TMC kan wan ha kabor kin pyndam noh ïa ka Memorandum of Understanding (MoU) pynbeit pud bala ïasoi hapdeng ka sorkar Meghalaya bad Assam.
Katba na ka liang jong u kyrtong ka UDP u bah Polestar Nongsiej haba kren sha ki lad pathai khubor u la ong ba thong jong u ka long ban kyntiew ïa ka bylla ka sngi ki paidbah ha ki shnong ki thaw ban peit kyrpang ïa ki samla ha ka ïoh kam ïoh jam bad kiwei. Ïa kine ki kyrtong la synran lang da ki paidbah nongkyrshan kiba la ïa shad kmen lang hala ki jong ki jong ki lama seng bad ki jingrwai ha khmat ka khyrdop jong ka ophis u Deputy Commissioner ka West Khasi Hills district
