SHILLONG:
U MLA barim ka seng National People’s Party na Ranikor Konstitwensi, u Martin M Danggo ha ka 1 tarik Rymphang u la mih noh na ka seng NPP ban pynïasoh pat bad ka seng Bharatiya Janata Party (BJP) ha kajuh hi ka sngi.
Ka la don ka jingkhmih lynti ba u MM Danggo un pynïasoh noh bad ka seng BJP namar da ki spah ngut ki nongkyrshan jong u ki la mih noh na ka NPP bad pynïasoh pat bad ka BJP myn ha ka 30 tarik Kyllalyngkot 2023.
Watla u Danggo u la ïoh ïa ka tiket ban ïakhun na ka seng NPP na Ranikor Konstitwensi, hynrei ka jingbym ïa sngewthuh jingmut hapdeng jong u bad katto katne ngut ki nongïalam ka seng ka la pynlong ïa u ban mih noh na ka seng bad pynïasoh syndon bad ka seng BJP mynta ka sngi.
Haba kren sha ki lad pathai khubor, u Danggo u la ong, “Baroh ki nongkyrshan jong nga ki don hangne, te ha ka 30 tarik Kyllalyngkot, baroh ki nongkyrshan jong nga ki la mih noh na ka seng NPP bad ki sngew ba nga ruh nga dei ban mih noh na kane ka seng ban pynïasoh pat bad ka seng BJP. Te katkum ka rai ka jong ki, nga pynïasoh ïalade sha ka seng BJP”.
Shuh shuh u la bynrap da kaba ong, ka shong ha ka rai bad ka jingkwah jong ki nongkyrshan jong u ban jubab kumno namar u shu kohnguh bad mynjur beit ïa ka jingkwah ki nongkyrshan jong u.
Nalor kata u la ong ruh ba ki nongkyrshan jong u ki kham tip bad sngewthuh bha halor kiei kiei baroh.
