SHILLONG:
Ka ophis jong u District Election Officer ka East Khasi Hills District ka la bthah ïa baroh ki seng saiñ pyrthei katkum ka jingbthah jong ka Election Commission of India ba hadien ba la kut ka por ban ïalap elekshon, yn nym shah shuh ïa kano kano ka jingïalap elekshon ha baroh ki konstitwensi, kumjuh ruh ki nongtrei jong kino kino ki seng saiñ pyrthei kiba pynkhreh ïa kine ki jingïalap elekshon kiba la wanrah na shabar jong ka konstitwensi ba kim dei shuh ban dang don hapoh ka konstitwensi.
Ha kaba ïadei bad kane, baroh ki seng saiñ pyrthei la bthah ba kin pynthikna ba baroh kine ki briew kiba wan ïalam na shabar ki bym dei ki nongthep vote jong ka konstitwensi ba kin mih noh na ki konstitwensi ba ki don shwa ka 4 baje janmiet ha ka 25 tarik Rymphang 2023.
