TURA:
U Myntri Rangbah ka jylla, u ba dei ruh u National President ka seng National People’s Party (NPP) u Conrad K Sangma u la sdang ïa ka jingïalap elekshon ha ka 30 tarik Kyllalyngkot na ka konstitwensi kaba u thmu ban ïakhun kata na South Tura konstitwensi.
Da ki spah ngut ki paidbah nongkyrshan ki la wan ban ïadon bynta bad ban pyndap ïa ka madan thymmai ha Tura.
Haba kren ha kane ka sngi, u Conrad Sangma u la ong, “Ka South Tura kan ai ïa ka vote jong ki ym tang ïa u Conrad Sangma kum u MLA hynrei ki ai ruh ïa ka vote jong ki ïa u Myntri Rangbah ka jylla”.
“Ka rai jong ki nongthep vote na South Tura kan ktah lang ïa kiwei kiwei ha kylleng ki jaka jong ka Garo Hills bad Meghalaya”, la ong u Myntri Rangbah ka jylla.
Haka por ba don jingïalang, u Myntri Rangbah ka jylla u la pyntip ruh ba un sa phah ïa ka kyrteng ha ka 4 tarik Rymphang ban ïakhun ha ka elekshon ban wan kata ha ka 27 tarik Rymphang 2023 na South Tura konstitwensi.
La ïohi ruh ba u Myntri Rangbah u la shad pynkhih met lang bad ki nongkyrshan jong u haba tem ïa ka jingrwai (theme song) ka NPP hadien ba la kut noh ka jingïalang.
