SHILLONG:
Ka jingthep vote ka dei ka hok jong uwei pa uwei u nongshong shnong ka ri India kiba la kynjoh palat ïa ka 18 snem shaneng ban pynpaw ïa ka rai jong ki ha kaba ïashim bynta ha ka jingjied ïa ki nongmihkhmat ne kita ki nongthawaiñ bad ka dei ruh ka jingkitkhlieh kaba khraw, namar ka shong ha ka rai jong uwei pa uwei kaba kumno ka lawei ki jied ïa kaba dum ne kaba phyrnai, kata da kaba long kiba stad ha kaba jied ïa ki nongmihkhmat ki ban trei na ka bynta ka ri bad ka jaitbynriew.
Hynrei kat nangmih ki sngi ki por, la iohi ba ki don ki briew ki bym khein kor shuh ïa ka vote, hynrei ki la pynlong noh tang kum ka tiket ban ioh pisa na kino kino ki kyrtong kiba pyndonkam da kaba ai pisa ïa ki paidbah bad ki don ruh ki bym kwah ban shim pisa hynrei kim kwah ruh ban vote namar ki sngew ba lada ki vote kim ioh jingmyntoi ei ei ruh em kaba long pynban tang kum jingpynmyntoi lem ïano re ïano, hynrei kim pyrkhat jngai ïa ka lawei jong ki khun ki kti bad kane ka jingkheiñ sting ka la ïalam ruh shaduh u pud ban don ki bym kwah shuh ban thep vote.
Dei halor kane ka nongrim ka Election Commission khnang ban wanrah biang ïa ka jingkitkhlieh ha man la uwei pa uwei u nongshong shnong ba la kynjoh palat ïa ka 18 snem shaneng, ka la ai da ki khusnam ïa ki nongthep vote kiba wan nyngkong bad kane ka la ktik biang khamtam ïa ki samla ban shim ïa kane ka jingkitkhlieh bad ban leit thep ïa ka shi vote kaba kordor jong ki.
Kane la iohi ba ka la khring ïa kiba bun wat kiba la heh ka rta ruh ba ki ïaleh ban poi shakhmat ban ioh ïa ki khusnam na ka Election Commission. Ïa kane la sakhi ruh mynta ka sngi ha Sohïong ha kaba ki don lai ngut ki samla kiba la wan shakhmat ban thep ïa ka vote jong ki bad kine ki samla ki la wan naduh ka por 2:30 mynstep. Katkum ka jingïathuh ki khubor la ong ba kine ki lai ngut ki samla ki la wan naduh ka por 2:30 mynstep ban ieng laiñ lypa ban thep ïa ka vote jong ki.
Kine ki lai ngut ki samla ki dei kiba la tip kyrteng kum u Welldone Kharrngi, u Franky Thabah bad u Shlurbor Kharrngi bad kiba dei na ka Polling Station Shiliang Dongki.
“Ngi la mih naduh ar shiteng na iing bad poi hangne ha ka por lai duna”, la iathuh u Samla Welldone bad ong bad ha ka por ba ki poi ha kane ka jaka ym pat don briew bad dei tang kine lai ngut ki shi paralok.
U la ong ruh ba ka jingwan step jong u ka long ban ioh thep nyngkong eh ia ka vote namar ka dei ruh ka sien ba nyngkong eh ba un ioh ban thep vote bad kane ka jingangnud jong u ka la urlong namar ka jingleit ïeng laiñ naduh dang saw ka tyngab.
Kine ki ar ngut, kata u Welldone bad u Franky ki dei ki samla ba ioh thep vote ha ka sien ba nyngkong eh mynta ka kynti ha kane ka elekshon MLA.
Hynrei ki don pat kiba shim ïa ka jingkitkhlieh, kane ka long kaei kaei kaba itynnad ha kaba mynta ka sngi ha Sohïong, la ïohi ïa ar ngut ki mei-ieit ki ba dei shipara, kiba la ïaid ryngkat ryngkat sha ka jaka thep vote ban ai ïa ka vote jong ki na bynta ban jied nongmihkhmat ha kane ka elekshon Sohïong ha ka 10 tarik Jymmang 2023.
Kine arngut, kata i mei-ieid Kror Sun, 77 snem ka rta bad i mei-ieid Amula Sun, 67 snem ka rta, ha la ki jaiñ kyrshah bad tapmoh khlieh, kidei kiba ju ïaleit ryngkat beit naduh mynshuwa kata man ba ki leit ban pyndep ïa ka hok jong ki, ban thep vote bad kumjuh ha kane ka sngi ruh, kam shym la don jingkylla bad ki la leit biang kumjuh kumba ju leh.
Ryngkat u dieng shanduh, i mei-ieid Kror Sun i la kren da ka jingsngew sarong ba i la shim bynta shitrhem ha ka tamasa jong ka synshar khadar. “Ngi la ju thep vote mynta ym lah ñiew shuh, ngim kynmaw shuh mynno ngi ai nyngkong eh ïa ka vote jong ngi ruh,” la ong i mei- ieid.
Haba i ong ba ka por ka la kylla ha ki phew snem, i mei-ieid Kror i la ong, “Ha ki por ba mynshwa, ka elekshon ka long kaba jai-jai hynrei mynta ka don bun ki kynrum kynram ha ka jingjied nongmihkhmat”.
Shuh shuh, i mei-ieid Amula Sun i la pynpaw ka jingsngew kmen man ka por ba i leit ban thep vote. “Ha man ka elekshon, ngi khmih lynti beit ïa u nongïalam ban trei bad ki paidbah. Ngi khmih lynti ba ki skhim bad ki kam pynroi kin tuid ha ka Konstitwensi,” i la ong.
I la ong ruh ba i khmih lynti ba u nongthaw aiñ un ïarap ban pynduna ïa ki jingeh jong ki samla ha kane ka juk kaba kyrduh kam.
“Ngim dei shuh ba ngi vote na bynta lade hynrei ngi vote na bynta ki pateng ba mynta bad lashai,” la ong ki mei-ieid baroh arngut.
