SHILLONG:
U nongthawaiñ na Umsning konstitwensi ba dei na ka seng Congress, u Dr Celestine Lyngdoh,ha ka 27 tarik Lber u la kren ha ka sur biria da kaba ong ba kawei na ka kambah ba ka sorkar Meghalaya Democratic Alliance (MDA)-I ka la wanrah jingjop ka long ka jinglah ban thaw ïa ka jaitbynriew ba thymmai ha ka jingkynthup jong ka Khasi, Jaiñtia bad Garo bad la khot ïa kata kum ka jaitbynriew “High-Level”.
“Ka sorkar MDA-I ka la ailad ïa kane ka jaitbynriew ban roi bad dei na ka daw jong kane, ki pulit – ki rangbah ha ka jaiñ uniphorm ki la jah burom hakhmatt ka Ïing bishar jong ka jylla,” la ong u Bah Lyngdoh katba u dang ïashim bynta ha ka jingïatai nia hapor ba la pynlong ïa ka dorbar mang tyngka, kata ha ka sngi ba hynriew jong ka Ïing dorbar thawaiñ ba 11 ka jylla.
U la ong ba hapoh ka jingsynshar jong kane ka sorkar, ka Ïing bishar ka la pynpaw pylleiñ ba ki la duh ka jingshaniah ïa ki pulit ka Meghalaya bad kumta ka la bthah ba dei ban wanrah noh da ki pulit ka Central Industrial Security Force (CISF) hapoh ka jylla ban tohkit halor ki jingleh jong kine ki jaitbynriew ba thymmai kata ka “High Level”.
“Haba ki pulit ki shem jingeh ban kynduh ïa ki jingbym lah jong ki briew ba don ha ka bor, kane ka dei ka jingma ba ngi pynïaid , ngi duh noh ïa ka burom hakhmat ka Ïing bishar, ha baroh kine ki kam, don mano re mano ban shimkhia ban leh na sha lyndet,” ula ong.
