SHILLONG:
U kyrtong ka National People’s Party (NPP) na Mawlai konstitwensi u Bah Teiborlang Pathaw u la nang ïoh bor shuh shuh hadien ba u MDC barim ka Mawlai konstitwensi, u Babu Linus Shadap, u la wan ban ai jingkyrshan ha kane ka kynti kaba mynta.
U Babu Linus Shadap u ba dei u MDC barim ka Mawlai ula shongthait noh hadien ba u la jop ar sien ïa ka ilekshon ha ki snem kiba mynshwa, une u rangbah ula rai ban ai jingkyrshan noh ïa u Bah Teiborlang Pathaw ha kane ka ilekshon MLA 2023, bad kane ka jingwan ai jingkyrshan jong u ka dei halor ki nongrim ba u MDC ba mynta jong ka Mawlai u dei briew uba don ki mat treikam ban shakri ïa ki paidbah bad kham tam eh ban kyntiew ïa ka Mawlai konstitwensi.
Ha ka jingïakynduh bad katto katne ngut ki riew rangbah ha ka ïingsah jong u ha Mawlai Mawdatbaki, u Babu Linus u la pynbna ba un ai jingkyrshan ïa u Bah Pathaw kum u kyrtong ka National People’s Party (NPP) ha kane ka ilekshon kaba mynta. U Babu Linus u dei uba la ju mihkhmat ïa ka Mawlai konstitwensi sha ka Ïingdorbar jong ka Khasi Hills Autonomous District Council ha kaba u la jop ha ki ar tylli ki ilekshon bad mihkhmat ïa ka Mawlai kum u MDC naduh u snem 1979 haduh 1989 bad hadien kane u la shongthait noh.
Na ka liang u Babu Moris haba kren ha kane ka sngi u la pynkynmaw ïa ki snem ba u Babu Linus u la long u MDC ka Mawlai konstitwensi uba la shongthait bad khlem ïakhun ilekshon shuh, bad u pynpaw ka jingshngaiñ namar ar ngut ki nongmihkhmat ka Mawlai kiba khlem pat shahrem ha ki ilekshon, kita, u Bah SD Khongwir bad u Babu Linus ki la wan ban ai jingkyrshan ïa u Bah Teiborlang Pathaw ha kane ka ilekshon.
Na ka liang u Babu Linus, haba u kren ha kane ka jingïalang ba lyngkot , u la ïathuh ba ha ki snem ba la dep u la ai ka jingkyrshan ïa u Bah Process T Sawkmie uba la iehnoh ïa ka jinglong MLA, bad ha ka ilekshon MDC, 2019 ruh, u donlang bad ai jingkyurshan ïa u kyrtong ka seng Congress u Bah Marbud Dkhar.
“Namarba ka Congress kala pait la pra, bad u Bah Process ruh u la phet sha kawei pat ka seng, na ka liang ka jong u ruh u hap ban ïaid noh la kajong, bad u la phaikhmat noh sha u Bah Teiborlang Pathaw namar une u rangbah u don ka jingïohi jngai ban shakri bad ban kyntiew ïa ka Mawlai, khamtam ïa ki khun samla,” u la ong.
Une u MDC barim ka Mawlai u la ïathuh ruh ïa ka daw balei u ai ka jingkyrshan ïa ka NPP bad khamtam eh ïa u Bah Teiborlang Pathaw namar u kum u briew uba la don ha ka Jylli saiñ pyrthei la katta phew snem, u khmih lynti ban ïoh synshar tang kawei ka seng ïa ka Jylla namar kam long kaba biang ïa ka synshar ka khadar haba ïoh ïa ka Sorkar khleh khaw lang lane Coalition government.
“Ki paidbah ki dei ban sngewthuh ba ki seng kiba thaw ïa ka Sorkar khleh khaw lang kim lah ban sait kti hynrei ki hap shim ïa ka jingkitkhlieh lang,” u la ong.
Ha kane ka sngi la donlang ki riew rangbah kiba kynthup ïa u Babu Moris Lyngdoh uba la donlang bad u Teiborlang Pathaw baroh shikatta, nalor u Bah George Kharmujai u riew rangbah uba la shongthait kum u Director ka tnat Soil and Water Conservation ka Sorkar Jylla, bad uba long ruh uwei na ki nongïalam ka NPP Mawlai Block uba peit ïa ki shnong kiba hap hapoh ka Zone-II.
