NONGSTOIÑ:
Da ki hajar ngut ki paidbah nongkyrshan ka seng Congress na Nongstoiñ ki la tuid sha ka jingïalang paidbah jong ka Nongstoiñ Block Congress Committee (NBCC) kaba la long ha ka 19 tarik Kyllalyngkot hapoh Bishop Hall Nongstoiñ.
Ha kane ka jingïalang la ïadon ryngkat lang u President ka Meghalaya Pradesh Congress Committee ba dei ruh u MP ka Lok Sabha u Bah Vincent H Pala, u Bah J.A Lyngdoh, u Bah B. Nonglang President District Congress Committee, u Bah Gabriel Wahlang President Nongstoiñ Block Congress Committee u ba long ruh u kyrtong ka seng Congress na Nongstoiñ bad kiwei kiwei.
U Bah Gabriel Wahlang haba ai jingkren ha katei ka sngi, u la ong ba 10 snem mynshwa ,u Bah Pala u la khot ïa u ban bud lada u kwah ban long MLA hynrei na ka liang jong u Bah Gabriel u la kyntait bad u la bud ïa u Dr. Mukul M Sangma hynrei u khlem lah ban poi sha ka thong ban jop MLA.
U la ong ruh ba balei ba u khlem mih na ka seng Congress namar u kynmaw ïa ki kyntien jong u Bah Pala bad mynta u la long u President ka MPCC bad ngeit ba kitei ki kyntien bala kren 10 snem mynshwa kin urlong mynta ka 2023.
Kiwei kiwei kiba la ai jingkren ki kynthup ïa u Bah J.A Lyngdoh u Bah Vincent Pala bad kiwei kiwei.
