SHILLONG:
U MDC ka Mawkhar-Pynthorumkhrah u Bah Pynshngain N Syiem u la ong ba wat la ki kyrtong ki ban ïakhun na ka Pynthorumkhrah Constituency kin dei ki kyrtong kiba khlaiñ hynrei na ka liang jongu, u la pynkhreh bha.
Haba kren bad u Kynjatshai, u Bah Pynshngain u la ong, “Ka jingpynkhreh jong nga na Pynthorumkhrah ka la long ka ba pura namar ba nga la dei u MDC la 3 snem tam bad nga la trei shitom”.
“Ka jingïakhun pyrshah ïa nga kan long ïa u MLA uba la jop 25 snem u Bah A.L. Hek bad kumjuh ïa u Bah Rocky Hek u ban ïakhun na ka party kaba khlaiñ hynrei kane kan ym pyntieng ïa nga namar ba ka elekshon kan sah ka elekshon lada dei makna u MLA 25 snem lane ka party kaba khlaiñ ruh kaba kut hi ka dei ha ka jingtreishitom”, u la ong.
Halor ka jingmih ki nongkitkam ka Congress, u Bah Pynshngain u la ong ba ka jingaidaw bym don ka jingïatreilang ka long ka bym shongnia namar ba kum ki nongïalam ka party lada don ka jingduna kin hap ban long kiba ïai shah namar ka jingïai shah hi kan wanrah ïa ka jingbha.
“Ngam kwah ban ong eiei namar kiba bun ki kyrtong kiba la mih na ka party jong ngi ban ïakhun na kiwei ki party, ka lah ban long ka rai ba bha tam lane kaba sniew tam”, u la bynrap.
U la ong ruh ba ha ka jingpeit jong u kiba bun ki kyrtong kiba shim rai kyrkieh ban mih na ka party, kin shem jingeh ban wan phai biang kum ki MLA hynrei ka jingshim rai kyrkieh kan sa poi sha jingbabe bad kan shong ha ka result 2023 bad kin don ki ban sa babe namar ba kin ym lah ban poi ha ka thong.
Haba kylli halor u kyrtong Myntri Rangbah, u Working President ka MPCC u la ong, “Ka kam Myntri Rangbah kan shong ha ki nongjop bad tang u kyrtong u ban jop, ka party kan sa shong bad shim rai ïa no kin jied ban long Myntri Rangbah”.
Ha kajuh ka por, u la ong ba haduh mynta ym don mano mano ruh ki MLA kiba kwah ban pynïasoh ïa ka Congress.
Ha kaba ïadei bad ka Garo Hill, u la ïathuh ba ka jingdon ka Deborah Marak ka don ka jingkyrmen ban ïoh jingjop ki kyrtong ka Congress na Garo Hills.
