SHILLONG:
U MLA barim ka Mylliem uba dei u MDC ba mynta na ka Congress u Bah Ronnie V Lyngdoh u la ong ba ka jingrem jong u ha u 2018 ka long ba la pyntieng pynthame ïa ki paidbah khlem nongrim.
“Ka daw ka jingrem jong nga ha u 2018 ka long ba la pyntieng pynthame ba u MLA ba mynta ïa ki paidbah khlem nongrim, ka bym don ka jingshisha. Hynrei tang shisnem ba nga rem, nga rem kumba 400 vote shiteng kaba jop haduh 2000 tam. Lada dei ba ki paidbah ki la shim ba kata ka mat bad ki daw ba la ai da une u MLA ba mynta u Bah Hamlet Dohling ka long kaba shisha, nga tharai ka MDC nga la kham rem shibun, hynrei nga la rem tang 400 shiteng ha ka MLA bad jop pat kumba 2000 tam, kaba long saw shah ïa ka Vote ba nga rem”, la ong u bah Ronnie haba kren bad ki lad pathai khubor.
U Bah Ronnie u la ong ba ka jingjop jong u kum u MDC ka dei kawei ka dak ki shin ba ki paidbah ki sngew donkam biang ïa ka jingshakri jong u kum u nongmihkhmat ym tang ha Mylliem hynrei ha ka jylla hi baroh kawei. “Lada ki paidbah ki dang ai biang ka lad ïa nga ban long u nongmihkhmat jong ki ha kane ka thaiñ Mylliem namar ki dang bun ki kam ban trei bad ban pyndep”, u la ong.
Haba kylli ba ka Congress kam don lyer shuh, u Bah Ronnie u la ong, “Mynta tang shitaiew tam ym pat don, artylli ki jylla ki long elekshon ka Gujarat bad Himachal Pradesh kaba synshar da ka sorkar BJP, kawei na kita ki jylla la jop ka seng Congress, kumno phi ong ba ka seng Congress kam don lyer shuh”.
Haba kylli ka jingphet ki MLA kan ktah ne em pat ïa ka Congress ha jylla Meghalaya, U Bah Ronnie u la ong, “Ki MLA kiba mih na ka seng Congress ki hap ban ïaleh elekshon biang, kam mut ba phi long MLA haduh ba phin da ïap, ki hap ban ïakhun biang bad u paidbah un sa rai jong u. Kane ka jingphet seng ka long ba phim burom ïa ka rai jong u paidbah”.
U la ong ruh ba ki nongmihkhmat kyntiap seng kim salia ban ieh ïa ki paidbah shadien na ka bynta ka jingmyntoi shimet.
U la ong ba haba peit mynta ka jylla Meghalaya ka don tang 2 ngut ki MP bad ka Iing Dorbar Thawaiñ ki la don kumba 800 ngut tam ki nongmihkhmat bad mano ban sngap ïa ki 2 ngut 3 ngut. U la ong lada ki don da ka National Party ka bym dei ka jingsngewpher niam.
U la kyntu ïa ki paidbah ha kane ka khep mynta ba kin kyrshan ïa ka seng Congress ba kin shngaiñ ka pateng ban wan. U la ong ba lada ki peit ïa ka sorkar MDA ka la sdang ban wanrah ban pynkylla lut wat ïa ka riti dustur ka Ri bad u la kyntu ïa ki paidbah ba kim dei ban dang beij shuh ha kane ka kynti ban wan.
U Bah Ronnie u la ong ba ki paidbah mynta ki la stad bad sngewthuh kano ka seng kaba im sngi ban pynim ïa u paidbah. U la ong ha ka por ka Congress shibun ki jingmyntoi ba la wanrah kum ki skhim bapher bapher na ka bynta ban pynmyntoi u paidbah. U la ong ba ki paidbah kidei ban jied bha kano ka seng kaba lah ban ai ka jingïada.
