SHILLONG:
U Bah Hamletson Dohling, uba la pynkut noh ïa ka jinglong MLA ha ka 5 tarik Kyllalyngkot, u la ong ba ka jingrung jong u sha ka National People’s Party (NPP) ka dei da ka jingmynjur jong ki nongïalam bad ki dkhot ka Core Committee bad kam dei kumba la kynnoh ba don ka jingtyrwa ïa u haduh T.5 klur.
Haba kren sha ki lad pathai khubor u Bah Hamlet u la ong ba ka jingiehnoh jong u ïa ka People’s Democratic Forum (PDF) ka dei hadien ka jingmynjur jong baroh lang ki nongïalam ki dkhot hapoh ka Core Committee.
U Bah Hamlet u la ong ba naduh ba u la jop ïa ka elekshon 2018 um ju leh marwei ïa kano kano ka kam hynrei ryngkat lang ka jingïapynbeit lem bad ki nongïalam, ki dkhot hapoh ka Core Committee.
“Kum u briew ngam lah ban ïeng pyrshah ïa ki nongïalam namar ha ka elekshon hi khlem ki nongïalam, ki nongkyrshan phin rai marwei phi la sah marwei, kumta nga sngap ïa uba bun balang, na kata ka daw nga shim ïa ka rai ban iehnoh ïa ka seng PDF”, la ong u Bah Hamlet.
Haba kylli ba ka jingmih jong u na ka party PDF kan nym ktah ïa kane ka party, u Bah Hamlet u la ong ba na ka liang ka jong u bad ka seng People’s Democratic Front (PDF) kumjuh ki nongïalam kam don kano ka jingïasngewpher jingmut bad mynta ka sngi shwa ba un mih ruh na ka liang ka PDF ka la ai ka jingkhublei kitbok kitrwiang ïa u.
U Bah Hamlet u la ong, “Ka elekshon hapoh Mylliem konstitwensi ka pher bha namar ki briew kim peit ïa ka party hynrei ki peit ïa u briew uba trei ïa ka kam. Ki briew ka Mylliem ki dei kiba stad, ki dei ba don ka jingkitkhlieh bad ki paidbah hi kiban bishar”.
U Bah Hamlet u la ong ba ha ka 7 tarik mynta u bnai un pynïasoh noh ïalade sha ka NPP ha madan Umlyngka.
U Bah Hamlet u la ong ba ka daw ka jingleit ban pynïasoh jong u sha ka NPP ka dei halor ki nongrim bad ki mat kiba biang. “Nga la ïakren bad ka NPP ïa ki ar tylli ki mat, nga la ïakren bad u Myntri Rangbah ka jylla u Conrad K Sangma, u Sumbud Myntri Rangbah ka jylla u Bah Prestone Tynsong ba dei ban pyndep ïa ki kam ba dang sahteng bad ki skhim pynroi, ka jingïakren halor u Uranium kam dei ban mih shuh. Ka mat kaba ktah ïa ka jaidbynriew ka dei ka Inner Line Permit (ILP) namar la ïakren hapoh ka Iing Dorbar Thawaiñ bad ka la poi shaduh Delhi hynrei ym pat don ka jubab halor kane bad na ka liang jong ngi, ngin ïai buddien. Kawei ruh ka mat ba ïakren ka dei ban pynrung noh ïa ka ktien Khasi hapoh ka khyrnit kaba phra bad kawei pat ban pynbeit ïa u pud u sam namar lada ka sorkar kam leh mynta te lano pat. Kine ki mat ba nga la ïakren bad ka NPP hashwa ba ngan rung sha kane ka party”, la ong u Bah Hamlet.
