SHILLONG:
U MLA ka Bharatiya Janata Party (BJP) na ka Pynthorumkhrah konstitwensi u Bah Alexander L. Hek u la ong ba kum u nongmihkhmat uba la shakri la 25 tylli ki snem u la sngewhun jrut ïa ka jingtrei jong u namar ba u la shakri khlem sangeh bad ha kane ka kynti ba mynta ruh u la sngewskhem ban jop biang ha kane ka elekshon, 2023.
Haba kren sha ki katto katne ki lad pathai khubor u Bah Hek u la ong ba um dei kum uta u MLA uba ïakynduh ïa ki paidbah tang ha ka shisien san snem lane ban ïakynduh ïa kita ki briew tang hashwa ka elekshon hynrei baroh 5 tylli ki snem naduh ba sdang haduh ba kut ka elekshon u don ryngkat ryngkat lang bad ki paidbah baroh.
U Bah Hek u la ong, wat hadien ba u la shakri haduh 25 hynrei ki dang don ki kam kiba dang sah kiba u dang angnud ban pyndep na ka bynta ka jingangnud u paidbah ym tang ha ka Pynthorumkhrah hynrei ïa ka jylla hi baroh kawei.
“Kumba nga ïohi mynta ki samla kynthei bad shynrang ka jylla jong ngi kiba la nang la tip bad kito ki bym don ka jingnang jingtip ka jingeh ba ki ïakynduh mynta kadei halor ka ïohkam ïohjam. Lada nga wan manga kum u myntri rangbah ka jylla ban ong ban aikam aijam ïa baroh te ka bym lah hi ban long lano lano ruh hynrei ka lynti ka lad na ka bynta ka security ki khun samla khnang ban lait na kano kano ka kam sniew”, la ong u Bah Hek.
U Bah Hek u la ong ba hapoh ka jylla Meghalaya ha ki 60 tylli seat ki nongthep vote ki long kumba 90 percent kiba bun ki paidbah ki bud ïa u kyrtong bad kiba bud ïa ka party ki don eh kumba 10 percent.
“Hynrei ha ka jylla Meghalaya nga shem ba nga la ïakhun ïa ka elekshon la 4 sien nga shem ba ki paidbah ki pynjop ïanga bad nga la ïakhun na ka seng Congress nga jop namar ki paidbah ki bud ïanga. Kane ka pyni ba ki paidbah ka jylla ki jied ïa u briew ym dei ïa ka party”.
Shuh shuh u la bynrap da kaba ong, “Saw sien nga ïaleh ïa kane ka elekshon na ka BJP nga la jop bad nga la ïaleh shisien na ka Congress ki paidbah ki Vote ïanga bad kane ka pyni ba ki paidbah ki jied ïa u briew ym ïa ka party”.
Ha kaba ïadei bad ka Pynthorumkhrah konstitwensi u Bah Hek u la ong, “Ka Pynthorumkhrah konstitwensi kadei ka General Seat bad khambun ki briew ki sngewtynnad ïa ka National Party kaba don ka jingshkem kaba lah ban ai ka jingsynshar kaba khuid, kaba lah ban wanrah ïa shibun ki kam pynroi”.
U Bah Hek u la ong ba ha ka jylla Meghalaya bun bah ki National Party kum ka National People’s Party (NPP), ka All India Trinamool Congress (AITC) bad kiwei hynrei baroh kita ki National Party kim lah ban ïanujor bad ka party BJP. Namar ka BJP ka dang shynshar hi hapoh kine ki 10 snem da u Myntri Rangbahduh ka Ri U Narendra Modi.
U Bah Hek u la ong, “lada don kiba jaitbynriew kiba khleh ha ka Pynthorumkhrah lane hangno hangno ruh nga peit ba baroh ki briew kidei ki jingthaw u Blei”.
Haba kylli, hato ka jingieng bun ki kyrtong ban ïakhun ïa kane ka elekshon na Pyntorumkhrah konstiwensi kan long ka jingeh ïa u, u Bah Hek u la ong, “Kat nang bun katta kan nang bha bad kan nang kham suk shuh shuh ïa u MLA uba don ha ka bor na bynta ban ïakhun ïa ka elekshon hynrei lada dei ba ïakhun para marwei kan don ka jingïakhun”.
Shuh shuh halor ka jingmih u Bah Rockey Hek ban ïakhun na ka party National People’s Party (NPP) ban ïakhun pyrshah ïa u, U Bah Hek u la ong, “Ban ïakhun ïa kano kano ka elekshon kadei ka mon laitluid jong uno uno u kyrtong”.
“U Bah Rocky um dei u pyrsa trai jong nga, ki la heh la san bad ki sngewthuh ïa ka jingim jong ki bad ki la sngew ba ki la rangbah kila lah ban mih ban ïaleh ïa ka ilekshon. Hynrei ban phah hi mangi ban pynpait ïa ka ïing ka sem ban pynpra ka bym lah ban long lano lano ruh bad ban pynlehrain ïa ka ïing ka sem, ngim ju leh kum kata ka kam”, la ong u Bah Hek.
U Bah Hek u la ong ba kane ka elekshon kan nym ktah ïa u bad bun ki paidbah ki bym da kham sngewtynnad ïa ki ruh, ki la wan sha ngi mynta”.
