SHILLONG:
Katba ka elekshon ka la jan, ki kyrtong ba thmu ïakhun ïa ka elekshon 2023 na ki Konstitwensi bapher bapher ki la wan ban thep ïa ka kyrteng jong ki ha ka ophis u Deputy Commissioner haman la ki distrik.
Ha ka 4 tarik Rymphang, u President ka seng Voice of the People’s Party (VPP) u ba dei ruh u kyrtong na Nongkrem Konstitwensi, u Bah Ardent M Basaiawmoit ryngkat kiwei pat ki kyrtong na ka seng VPP ki la wan ban thep ïa ka kyrteng jong ki ha ka ophis u Deputy Commissioner ka East Khasi Hills Distrik.
Haba kren ha kane ka sngi, u Bah Ardent u la ong ba kum ki nonpynkhreh kin ïai bteng ban pynkhreh bad ki leit sha ki paidbah ban pynsngewthuh shuh shuh ïa ka thong bad ka nongrim jong ka seng khamtam eh na kane ka seng kaba thymmai.
Haba kren halor ka jingïakhun pyrshah ïa ki kyrtong heh spah hapoh ka Konstitwensi, u Bah Ardent u la jubab, “Nga rem tang 76 vote ha ka elekshon ba la dep bad ka jingrem ka jong nga ka long namar ba nga khlaiñ palat bad ban ong haduh katno nga sngewskhem, ka jingpynleit jingmut jong nga kam dei ïa kata ka pisa, ngam da khuslai than ïa ki liang pyrshah, ki jingpynleit jingmut jong nga hi naduh nyngkong ki sngi ka long ban pynsngewthuh ïa ki paidbah”.
Shuh shuh u la ong, “Kumba ka long mynta hi kam dei tang ha Nongkrem Konstitwensi, ka don ka jingsngewthuh jong u paidbah ha kylleng ki Ri. Kaba nga ngeit ngi ïohi lyngba ki lad pathai khubor, ki jingkynthoh ki ba bun ba ki paidbah kine ki sngi ki la sdang sngewthuh ban jied ïa ki nongïalam bad hangno ban pynshong nongrim, te ngam ïohi ba ka pisa kan wan hakhmat ha kane ka kynti ba mynta”.
Haba kren halor ka jingjubab u kyrtong na Mawhati ba u kyrtong barim ka Mawhati u ban sa ïakhun noh na Nongkrem um sym la leh bha ïa ka Mawhati, u Bah Ardent u la jubab, “Nga ngeit ngim da donkam shuh ban batai namar u kyrtong ban ïaleh na Mawhati bad u kyrtong ban ïaleh na Nongkrem ki dei shi ïing te lada na kajuh ka ïing ka mih artylli ka sur te u paidbah u la sngewthuh ban bishar ym da donkam ban dang batai manga”.
Haba ïadei bad ka jinglah treikam jong u MLA ka Nongkrem Konstitwensi, u Bah Ardent Basaiawmoit u la ong ka 2 tarik hi kan rai. Dei ha ka 2 tarik Lber ba ngin tip la ki paidbah ki pdiang bad ki hun ne em ïa ka rukom treikam jong u MLA jong ki.
Na ka liang u Bah Ardent Basaiawmoit u la pyntip ba shen ka seng kan pynbna ïa ki mat treikam jong ka seng hynrei ha shwa ïa kata kin sa pyllait shwa ïa ka ‘vision document’ jong ka seng ha kine ki khyndiat sngi.
U Bah Ardent u la pynshai ba ki mat ba hakhmat eh jong ka seng VPP ka long ban weng ïa ki jingkit bakhia jong ki paidbah kaba ban khia ïa ki paidbah kata ka ba mut ka pang ka shitom, ka pule ka dangle bad ka ïoh ka kot jong ki paidbah nalor kiwei pat ki mat ki ba bun.
“Ki paidbah ka Nongkrem ki la tip bha ïa nga, te ngi donkam tang ban wanrah ka jingpynshai ba khambha halor ka jingpyndonkam da ka bor pisa khnang ba ki paidbah kin nym ngop ha kane ka jingshah riam ,” u la ong.
U la ong ruh, “Ki paidbah ki donkam ban jied ïa ngi namar ngi dei tang kita ban mih bujli ban wanrah ka synshar khadar kaba bha hapoh ka jylla namar ngim lah ban khmih lynti ïa ka synshar khadar kaba bha hapoh ka jylla lada baroh ki seng saiñ pyrthei ki pyndonkam da ka pisa tang ban shah jied ha ka bor”.
![](/app/uploads/2023/02/BOTTOM-AD3720x60-1-1.png)