SHILLONG:
Ka Kyrtong ka NPP na ka bynta ban mihkhmat ha ka MP election na ka bynta ka Shillong Parliamentary Seat ka Kong Ampareen Lyngdoh, haba pan jingkyrshan na ki nongshong shnong ka Mairang ha kane ka election ka la ong ba kum ka kynthei briew ka lah ban trei khambha ban ïa ki rangbah kiba la long Member of Parliament (MP) na Shillong seat.
Haba kren halor ka jingwan pynïasoh u Bah Batskhem sha ka NPP myn ha ka 25 tarik kyllalyngkot 2024, ka la ong ba wat ju artatien halor ka jingpynïasoh jong phi sha ka NPP namar ba ka NPP kan dei ka party ka ban ïa lam ïa phi shakhmat.
Halor ka MP election ka la ong, “Ka kamram jong ka MP ka dei ban rah ïa ki mat jong ka jylla sha nongbah Delhi, dei ban ïasaid lang halor kine ki mat.
Ka la bynrap, “la 3 samoi la phah ïa u MP da ka jingthrang ban pynurlong ïa ki mat jingdawa bad shihajar nguh lehse u la pyrshang hynrei namar bym don lang ha ka synrop lang ha Delhi ym don ba sngap, kumta ka donkam ïa ka Shillong Parliamentary Seat ban ïoh da ka MP ka ban don lang ha ka liang shynshar khnang ka kin sngap kin peitngor haba ngi leit sha Delhi.”
Ka Kong Ampareen Lyngdoh ka la ong ba lada u paidbah u ai ka jingkyrshan ba pura ha kane ka MP election ka kular ban trei shitom ban long ka ksiang ban ïa saitlem na ka bynta ki jingangnud ka jylla.
“Lada ka MP bad ka sorkar jylla kam don lang ha ki kam kan ïa lait ka rukom treikam bad lada phi phah ïa ka MP na ka party kaba don ka jingïatreilang bad ka sorkar pdeng kan lah ban kham trei kham bha,” ka la ong.
“Ha kaba ïadei bad ka jingïalap ïa ka MP election nga la ïaid shait shait ban sngap bad peit ïa ki jingeh ki nongshong shnong ba ngan trei kum ka MP,” ka la bynrap.
Ka la ong shuh shuh, “Ha kaba ïadei bad ka jingjied ïa ki MP phi dei ban klet noh ïa ka jingïashah party bad phin jied ai ka MP kaba lah ban ïasait na ka bynta jong phi.”
“Ha ka jinglong MLA jong nga, nga la pyni ïa ki kam ba nga trei ha ki bynta bapher bapher bad ha ka MP ngan pyni ïa ka bynta ha ka shynshar khadar.”
Ka Ampareen ka la ong ba, “Ngam dei ka MLA kynthei ne shynrang hynrei nga dei ka MLA jong phi bad ngan trei shitom bad pyni ïa ka jingtrei khambha ban ïa u rangbah uba phi la phah sha Delhi.”
“Jied ïa nga namar nga la dei ka MLA kaba la pyni nuksa ïa phi ïa ka jinglah jong nga ban trei ïa ka kam, namar nga don ïa ka jingtip ka jingnang, jied ïa nga namar nga don ha ka party kaba la trei lang bad ki party ha Delhi,” ka la bynrap.
“Ngan trei shitom bad nga la tyrwa ha phi, mon maphi bad lada nga lah ban ïajan ïa ka Delhi bad ka jylla kan don ka jingmyntoi kaba khraw,” ka la ong.
