SHILLONG:
“Ngan pynbha ïa ki jingjulor ba la leh da u MLA barim ka Sohïong Konstitwensi bad nga dei u ksai ban bteng ïa ka kam ka ba dang sahteng jong u Bah HDR Lyngdoh”, ong u kyrtong ka United Democratic Party (UDP),u Bah Synshar Kupar Roy Lyngdoh Thabah.
Ha ka 19 tarik Ïaïong, u Bah Synshar Lyngdoh Thabah, ha ryngkat ka jingïasynran lang u President ka UDP u Bah Metbah Lyngdoh uba dei ruh u MLA ka Mairang, u Bah Paul Lyngdoh u Working President uba dei ruh u MLA ka West Shillong, u Bah Renikton L Tongkhar u MLA ka Mawkyrwat, bad kiwei kiwei ki nongkitkam ha ryngkat ki spah ngut ki nongkyrshan, u la wan ban thep ïa ka kyrteng ban long kum u kyrtong na ka bynta ban ïakhun ïa ka election ha Sohïong Konstitwensi ka ban long ha ka 10 tarik u Jymmang.
Ha shwa kane ka jingleit thep kyrteng, ka UDP ka la pynlong ïa ka jingïalang ha ophis treikam jong ka, ban kitbok kitrwiang ïa u Bah Synshar Lyngdoh Thabah, bad kyntu ruh ïa ki MLA, ki MDC bad ki nongkitkam ba kin hiar sha Sohïong Konstitwensi na ka bynta ban pynthikna ïa ka jingjop ka UDP na kane ka thaiñ.
Lah ban kdew hangne ba ka election ban jied ïa u nongmihkhmat na Sohiong Constituency, la rah noh sha ka 10 tarik Jymmang, hadien ba u kyrtong ka UDP na Sohïong Konstitwensi , u Bah HDR Lyngdoh u la khlad kyndit shitaiew shwa ban long ka general election ha ka jylla.
Ha ba kren ha kane ka sngi, u Bah Synshar Lyngdoh Thabah u la ong, “Kane ka dei ka sngi ka ba kyrpang, haba kynmaw ïa u mama jong nga u Bah HDR Lyngdoh u ba la wan ar bnai mynshwa ban thep ïa ka kyrteng shwa ka election”.
“U Bah HDR Lyngdoh u dei u briew u ba la ih bha ha kane ka kam hynrei u la khlad noh, bad ka jingïap jong u ka long ka jingduh ka ba khraw ïa ka jylla, ka party, bad nga don hangne mynta ban long u nongmih pli ha ka jaka u Maheh Don, nga don hangne ban dang bteng ïa ki kam ki ba dang sahteng”.
“Ki nongshong shnong ka Sohïong Konstitwensi ki ïai dwai man ka sngi namar ki kwah ban pynmih ïa ki nongthawaiñ ym tang ki nongmihkhmat, ki kwah ban ïoh ïa u nongmihkhmat u ba lah ban kren ha poh ïingdorbar thawaiñ, u nongmihkhmat u ban lah ban pynsngew ïa ka jingeh ki paidbah u ba lah ban kren ban kdew na ka bynta ka bha ka miat ïa ka Ri bad ka jaitbynriew”, u la bynrap.
U la kdew ruh ba “Da ka jingieid jong ki paidbah nga sngew skhem ba ngan sa ïoh ïa ka jingjop, ngam kwah ban bishar ïa kano kano ka party hynrei nga peit ïalade bad nga sngew skhem ba ngan jop ngam kwah kren eiei halor kiwei ki party”.
U la ong, “Kumba u Bah HDR Lyngdoh, u la kular ba un pynbha ïa ka jingjulor ka ba u MLA barim u la leh ha kane ka Konstitwensi nga ruh nga kular ïa kata”.
“Hooid u la ong ban pynbha ïa ka jingjulor ka ba la leh da u MLA barim bad mynta nga dei u ksai ban bteng ïa ka jingkular jong u Maheh Don, ban peit ïa ki kam ki ba dang sahteng”, u la bynrap.
