SHILLONG:
U working President ka United Democratic Party (UDP) u Bah Titos W Chyne u la ong ba ka rai ban pynshong shuki lane ban pynhiar shuki ïa u Myntri ka tnad kam pohïing, u Bah Lahkmen Rymbui, kan shong ha ka rai jong u nongïalam ka party u Bah Metbah Lyngdoh lane u nongïalam ka jylla u Conrad K Sangma.
Haba kren bad u kynjatshai, u Bah Titos W Chyne u la ong, “ha man ki jingjia kum kine ka ju don ka jingpeit khmat ïa u myntri ba dei peit ïa ka tnad kampohïing ha ka sorkar jylla namar ka dei ka kamram jong u ban tehlakam”.
U Bah Chyne u la ong ruh ba ka party ka don ka jingsngewkhia halor kane ka jingjia ha Mukroh hynrei na ka liang ka party ka la aiti ha u nongïalam ka party bad kumjuh ha u nongïalam ka sorkar kaei ka ba bha tam ba ki dei ban leh.
“Lehse na ka liang u Myntri rangbah, u ba dei u khliehduh jong ka sorkar lada u i donkam ban pynhiar shuki ne ban pynneh kan shong ha ka rai jong u”, u la ong.
U la bynrap “ngan ym lah ban ong la u dei ne em ban hiar shuki bad kan shong ha u la u sngewthuh ba ka tnad kaba u bat bad lada dei ba u sngewthuh ba ka dei ka jingbakla jong u, te un ai yn hiar shuki hynrei lada u sngewthuh ba kam dei ka jingbakla jong u te ym dei ban hiar shuki”.
