SHILLONG:
U Bah Metbah Lyngdoh, u President ka United Democratic Party (UDP) bad uba dei ruh u MLA ka Mairang, u la pynpaw ïa ka jingkyrmen ka ba khraw ba u Bah Synshar Lyngdoh Thabah un ïoh ïa ka jingjop na Sohïong Konstitwensi, da ka ba kdew ba u dei u kyrtong u ba la biang nadong shadong.
Mynta ka sngi ki nongïalam, ki MLA ki MDC ka UDP ki la wan ban synran ïa u Bah Synshar Lyngdoh Thabah, u ba la wan ban thep kyrteng ba ka bynta ban long kum u kyrtong ka UDP ban aireng ha ka election Sohïong ka ban long ha ka 10 tarik Jymmang 2023.
Ha ba kren sha ki lad pathai khubor u Bah Metbah Lyngdoh u la ong, “Ka jingpynïasoh jong u Bah HDR Lyngdoh sha ka UDP ka long kawei na ki daw ba u kwah ban pynkhlaiñ ïa ka seng riewlum, hynrei u la khlad noh”.
U la ong ba “Kawei ka long halor ki kam ki ba u la trei na ka bynta ka Sohïong Konstitwensi, ha ki 20 -25 snem, ka jingsngew skhem jong ka UDP ba ki paidbah kin ai ka jingkyrshan ka long ruh namar ba ngi ïoh ïa u kyrtong u ba la long u ba biang nadong shadong”.
U la bynrap “Kine ki daw ki ba la pynlong ïa ka UDP ba kan leit ban ïawer ïa ki paidbah na Sohïong Konstitwensiba kin vote na ka bynta u kyrtong jong ngi”.
