SHILLONG:
U MLA ka Nongstoiñ na ka seng Congress, u Bah Gabriel Wahlang u la ong ba ka Congress kan nym kyrshan ïa ka MDA 2.0 ba la ïalam da ka NPP, kane ka jingkren jong u Bah Gabriel ka long hadien kiba bun ki jingkynthoh halor ka jingleit kyrshan ka Congress ïa ka NPP ha KHADC kaba la wanrah ïa ka jingkhyllem ka Executive Committee ba la ïalam da ka UDP.
Lah ban kdew ba ha KHADC ka jingïatreilang ka UDP bad ka NPP ka la pra noh hadien ba u MDC ka NPP na Rambrai-Jyrngam u Bah Bajop Pyngrope u la ai da ka No Confidence Motion, lane ka jingbym shaniah shuh ïa ka EC hapoh ka jingïalam jong u Bah Titosstarwell Chyne. Hadien ka jingkhyllem kane ka EC ba la ïalam da u Bah Titos, na ka liang ka Congress ka la leit ban ai jingkyrshan ïa ka NPP ban thaw thymmai ïa ka EC hapoh ka jingïalam jong u Bah Pyniaid Sing Syiem, MDC ka NPP na Sohryngkham ban long kum u CEM bathymmai. Hynrei kane ka jingleit kyrshan ka Congress ka la don ka jingïatyngkhuh bad shah kynthoh namar ha ka sorkar jylla, ka NPP bad ka UDP ki dang ïatreilang haduh mynta bad ka Congress ryngkat ka TMC bad ka VPP ki shong ha ka liang pyrshah.
Haba kren halor kane, u Bah Gabriel, uba dei ruh u MDC u la ong ba ka jingkyrshan ka Congress ïa ka NPP kan long beit tang hapoh ka District Council ym ha ka sorkar jylla. “Ngi kyrshan tang ha District Council na ka bynta ka jingbha ka kolshor jong ngi. Ka District Council ka ïapher bak lybak na ka jylla. Ha ka District Council ngi peit ïa ka kolshor jong ki briew”, la ong u Bah Gabriel.
U la pynpaw shai ruh ba na ka liang ka Congress kan nym kyrshan ïa ka NPP ha ka jingïalam jong ka ïa ka sorkar jylla. “Da lei lei ruh ngin nym kyrshan ïa ka NPP ha ka jylla”, la ong u Bah Gabriel.
