SHILLONG:
Ka Myntri Sorkar jong ka jylla, ka Kong Ampareen Lyngdoh, ka la ong ba ka jingjop jong ka Seng United Democratic Party (UDP) ha Sohïong Konstiwensi kam long ka jingkhanglad ïa ka National People’s Party (NPP) bad ka party kan ïaid shakhmat namar kam don kano kano ka jingïashun hadpeng jong ki.
Haba kren sha ki lad pathai khubor, halor ka jingbym poi ka NPP sha ka thong, ka Kong Ampareen ka la ong ba ka jingïakhun ha katei ka konstitwensi ka long kaba shitrhem hapdeng ka NPP bad ka UDP, “Kam lei lei ka elekshon ka ïaid ha ka elekshon, ka jingïaleh kadei beit tang kine ki artylli ki party NPP bad UDP bad kine ki artylli ki party ruh ki don bad ka sorkar MDA 2.0. Wat lada ngi rem ruh hynrei ngi sngewtynnad pat ban ïohi ba kawei na ki party ba don ha ka sorkar synrop lang ka jop, hynrei na ka liang jong ngi, ngi kitbok kitrwiang ïa une u MLA ba un dang lah ban trei shitom ha kine ki san snem. Mynta ngi khmih lynti ban ïaid shaphrang ha ka sorkar synrop bad ngi kyrmen ba shen ngin sa ïoh ban ïashong lang ha kajuh ka miej ban ïakren halor ka Common Minimum Programme (CMP) jong ngi”.
Haba kylli hato la kan don ne em ka jingeh hapdeng kine ki ar seng ha ka sorkar MDA 2.0, ka Kong Ampareen ka la ong ba ka thong kaba kongsan jong ki ka long kumno ba kin ïatreilang.
Shuh shuh ka Kong Ampareen ka la ong, “Ha kano kano ka party ba phi ïakhun ne ïaleh ïa ka elekshon, haba phi sngewthuh ban don ka lad ba phin jop, phin pynkhraw bad pynksan beit ïa la ka jong ka party, hynrei ngi kiba donlang ha kane ka sorkar ngi sngewdei ban pyndem noh ïa kane ka jingïakynad namar ngi kiba don ha ka sorkar ngi donkam bha ban ai ka jingshakri kaba bha na ka bynta u paidbah”.
Ka Kong Amapareen ka la ong ruh ba ka jingjop ka UDP ha Sohiong konstitwensi kadei namar ka jingkynmaw ieid jong ki paidbah ïa u Bah H.D.R Lyngdoh (Bam Kwai ha dwar u Blei). Ka Kong Ampareen ka la ong ba ka pdiang ïa kaei kaba la jia bad ka ieh ïa kata ha ka jingsngewthuh jong ki paidbah bad na ka liang jong ka sorkar ka lah ban ïaid shakhmat.
Ha kawei pat ka phang, haba kylli halor ka jingai por hapoh 48 kynta ka seng Voice Of The People’s Party (VPP) ban pynsangeh shipor ïa ka jingthungkam ha ki tnad sorkar bapher bapher, ka Kong Ampareen ka la ong ba kam lah ban jubab ïa kane bad ka la ong ba kane kan shong ha ka jingpeit bastad jong u Myntri Rangbah ka jylla.
