SHILLONG:
U President ka People’s Democratic Front (PDF) uba dei ruh u MLA ka Sohra Konstitwensi, Bah Gavin Miguel Mylliem u la ong ba kam ïahap ban buh jingkylli ïa kaba ki nongïalam barim ki la leh naduh ki por ba la dep halor ka Reservation Policy hadien ka jingïoh ïa la ka jong ka Jylla ha u snem 1972.
“Ngi ïohi ba ka jingkylli ka mih ha kano ka dur kin pyntrei kam ïa ka Roster System la ka dei naduh ba sdang ne nangne sha khmat. Ngim lah ban len ba lada ngi phai dien naduh u snem 1972, kum ka Jylla ka long kaba duna ha bun ki liang bad ngi sngewthuh ban pyntreikam ïa ka roster system khlem ki jingshisha hynrei tang da ki jingtharai kam dei kaba suk,” u la ong.
U la bynrap da kaba ong ba na ka liang ka jong ki, ki thrang ban pyntrei kam ïa ka Roster System nangne sha khmat khnang ba kiei kiei baroh kin ïaid beit. U la ïathuh ruh ba na ka liang u Myntri Rangbah u la pynsngew ba ha kine ki khyndiat sngi kan sa don ka jingïakynduh jong ki Myntri ban ïatai halor kane bad ruh kin sa rah ha ka MDA bad ruh ha ka jingïakynduh jong baroh ki seng bad hangta ka PDF kan sa pynsngew ïa kaei kaba ki don.
“Ki la don kiba la kren halor kane ka mat, hynrei da ki phew snem ngi la ïoh ïa ka jylla bad ngim pat ïoh ïa kata ka formula kaba biang. Nga kyntu ïa ki seng saiñ Hima ba kim dei ban leh politic ïa kane ka mat,” u la ong.
U Bah Gavin u la bynrap ruh da kaba ong ba ka sorkar kan sa thaw da ka komiti kaba kyrpang bad kane ka komiti kan sa ïathir ïatai bad kyrmen ba kane ka komiti kan lah ban wan rah ïa kaba bha tam na ka bynta ki paidbah ka jylla.
“Ngim dei ban wan rah ïa ka jingïapher hynrei ban don ka jingïatylli ha baroh ki paidbah jong ka jylla khlem kheiñ ïa ka jingïapher jaitbynriew,” u la ong.
Shuh shuh u la ong ruh ba na ka liang ka jong ngi ban buh jingkylli ïa ka jingrai jong ki nongïalam kiba rim kam dei ka lynti kaba dei, ban ïoh kat ïa ka jylla lajong kam dei kaba suk. Ngi shaniah ïa ka jingstad ka jong ki bad na ka liang ki nongïalam ba mynta ki angnud ban kyntiew ïa ka ha ki liang bapher bapher.
